Jyl sońyna deıin avtokólik quraldaryn qozǵalys barysynda ólsheýdiń avtomattandyrylǵan júıesi engizilmek - KKM
ASTANA. 19 jeltoqsan. QazAqparat - Jyl sońyna deıin avtokólik quraldaryn qozǵalys barysynda ólsheýdiń avtomattandyrylǵan júıesin engizý kózdelýde.
Bul týraly QR Kólik jáne kommýnıkatsııa mınıstrligi taratqan aqparatta aıtylǵan.
Vedomstvonyń habarlaýynsha, bıyl aýyr júk kólikterin baqylaýdan ótkizý júıesin jetildirý sharalaryna basa kóńil bólindi. Barlyq statsıonarlyq jáne mobıldi beketter beınebaqylaý júıesine qosyldy. Nátıjesinde kóliktik zańnamany buzýshylyqty anyqtaý kórsetkishi artty. Aǵymdaǵy jyldyń naýryzy men jeltoqsany aralyǵynda óndirilip alynǵan ákimshilik aıyppul men alymdardyń kólemi 1 mlrd. 62 mln. teńgeni qurady, bul ótken jylmen salystyrǵanda 2 ese kóp.
«Sybaılas jemqorlyqqa qarsy kúres sharalarynyń aıasynda aǵymdaǵy jyldyń sońyna deıin avtokólik quraldaryn qozǵalys barysynda ólsheýdiń avtomattandyrylǵan júıesin engizý kózdelýde. Bul júıe sondaı-aq, aýyr júk kólikterin ólsheýge jumsalatyn ýaqytty qysqartýmen qatar, kólikterdiń salmaq gabarıtiniń sáıkestigin tekserý barysynda adamı faktordyń oryn alýyna jol bermeıdi», - delingen habarlamada.
Mundaı alǵashqy qurylǵylardy «Batys Eýropa - Batys Qytaı» halyqaralyq kólik dáliziniń Jambyl oblysyna qarasty Merke aýyly mańyndaǵy, Qyzylorda oblysyna qarasty Jańaqorǵan aýyly mańyndaǵy jáne Aqmola oblysynyń «Astana - Kıevka - Temirtaý» avtojolynyń Qosshy aýyly mańyndaǵy ýchaskelerge ornatý kózdelýde.
