Jyl sońyna deıin aýyl mektepterine 362 avtobýs jetkiziledi

ASTANA. QazAqparat – Bıyl jyl sońyna deıin aýyl mektepterine oqýshylardy tasymaldaýǵa arnalǵan 362 avtobýs jetkiziledi. Bul týraly Premer-Mınıstrdiń orynbasary – Saýda jáne ıntegratsııa mınıstri Serik Jumanǵarın málim etti, dep habarlaıdy QazAqparat tilshisi.

«Balalardyń joldaǵy qaýipsizdigin qamtamasyz etetin is-sharalar kesheni ulttyq zańnamada kózdelgen. 2022 jyly balalardyń qatysýymen 3 385 jol kólik oqıǵasy tirkeldi, onyń ishinde 248 bala qaza tapty (2021 jyly – 200), 3 989 bala jaralanǵan (2021 jyly – 3 333). Memlekettik jalpyǵa mindetti bilim berý standartynda «Jol qozǵalysy erejeleri» kýrsy barlyq oqý deńgeıinde kózdelgen (bastaýysh, negizgi orta jáne jalpy orta, tehnıkalyq jáne kásiptik). Balalardy tasymaldaý talaptarynyń saqtalýy tekseriledi. Budan basqa, jergilikti atqarýshy organdar bilim mekemeleriniń janynda qaýipsiz ınfraqurylym qurý jóninde shara qabyldap jatyr», - dep atap ótedi Serik Jumanǵarın taıaýda taratylǵan Májilis depýtattarynyń saýalyna bergen jaýabynda.

Onyń atap ótýinshe, otbasy jáne balalar salasynda memlekettik qyzmetter kórsetý qaǵıdalarynda jergilikti atqarýshy organdardyń bilim alýshylardy jaqyn mektepke deıin tegin tasymaldaý qyzmetin kórsetýge qoıylatyn talaptar aıqyndalǵan.

«Balalar jyly aıasynda Oqý-aǵartý mınıstrligi jergilikti atqarýshy organdarmen birlesip, 2022 jyly aýyldyq mektepteriniń avtobýs parkin (515 avtobýs) jańartý jobasyn iske qosty. Búgingi tańda óńirlerge 153 avtobýs jetkizildi, qalǵan 362 avtobýs 2023 jyldyń aıaǵyna deıin mektepterge jetkiziledi», - dedi vıtse-premer.