Jyl sońyna deıin aýdandyq sýdıalar sany 100 birlikke artady - QR Joǵarǵy sotynyń tóraǵasy

ASTANA. QazAqparat - Aǵymdaǵy jyldyń sońyna deıin aýdandyq sýdıalardyń sany 100 birlikke artatyn bolady. Bul týraly búgin respýblıka sottarynyń 2014 jyldyń 1-shi jartyjyldyǵyndaǵy jumystarynyń qorytyndysyna arnalǵan keńeıtilgen jıynda QR Joǵarǵy sotynyń tóraǵasy Qaırat Mámı málim etti.

Sottardy bilikti kadrlarmen jáne materıaldyq-tehnıkalyq qural-jabdyqtarmen qamtamasyz etý máselesi sheshilý ústinde ekendigin atap ótken ol: «Ózderińizde biletindeı, jyl basynda el Prezıdentiniń Jarlyǵymen aýdandyq sýdıalardyń shtattyq sany 450 birlikke artqan bolatyn. Qazirgi ýaqytta 150 sýdıa taǵaıyndaldy», - dedi.

Joǵarǵy sot tóraǵasynyń sózine qaraǵanda, budan bólek 100 kandıdat Joǵarǵy sot keńesiniń sońǵy otyrysynda minezdeme alǵan jáne taǵy 100 birlik bos orynǵa baıqaý jarııa etilgen.

«Osy jyldyń tórtinshi toqsanynyń sońyna deıin qalǵan 100 bos sýdıalar orny bólinetin bolady», - dedi Q.Mámı.