Jyl sońyna deıin Atasý-Alashańqaı munaı qubyry jobasyna 150 adam jumysqa tartylady
Bul týraly búgin QR Parlamenti Senatynyń jalpy otyrysynda QR Munaı jáne gaz mınıstri Uzaqbaı Qarabalın málim etti. Eske salsaq, jıyn barysynda palata depýtattary «Qazaqstan men Qytaı arasyndaǵy «Qazaqstan - Qytaı» munaı qubyryn damytý jáne paıdalaný kezindegi yntymaqtastyqtyń keıbir máseleleri týraly kelisimdi ratıfıkatsııalaý týraly» QR zańy qabyldanǵan bolatyn.
«Búgingi tańda «Atyraý - Keńqııaq - Qumkól - Atasý -Alashańqaı» baǵytynda 1 myńǵa tarta adam turaqty jumys isteýde. Al jyl sońyna deıin «Atasý - Alashańqaı» munaı qubyrynda 2 jańa munaı aıdaý stansasy iske qosylady. Sonda bul jobaǵa qosymsha 150-ge jýyq turaqty jumys ornyn qurý josparlanady. Jalpy joba aıasynda 400-ge tarta turaqty jumys ornyn qurý kózdelip otyr», - dedi mınıstr. Onyń sózine qaraǵanda, qurylystyń alǵashqy eki jylynda 2 myńǵa jýyq ýaqytsha jumys oryndary da qurylmaq.
