Jyl sońyna deıin Aqmola oblysynda 1 myńnan astam jańa jumys orny ashylady
KÓKShETAÝ. QazAqparat - Aqmola oblysynyń ákimi Málik Myrzalın atqarylǵan jumystar týraly depýtattar aldynda esep berdi, dep habarlaıdy QazAqparat tilshisi ákimdiktiń baspasóz qyzmetine silteme jasap.
Oblystyq máslıhattyń 14-shi sessııasynda aımaq basshysy oblys boıynsha bıylǵy jyldyń jeti aıynda atqarylǵan jumystar týraly aıtyp berdi. Aımaq basshysynyń sózine qaraǵanda óńirde damý úrdisi baıqalady. Naqtyraq alsaq, aýyl sharýashylyǵy jáne qurylys salasynda kórsetkishter joǵary.
Osy aralyqta ekonomıkaǵa tartylǵan ınvestıtsııa kólemi 110,9 paıyzdy qurady. Jyl basynan beri oblysta 100 astam áleýmettik, ónerkásiptik ınfraqurylym, shaǵyn jáne orta bıznes nysandary ashyldy. Jumyssyzdyq deńgeıi 4,8 paıyzǵa tómendedi. Oǵan qosa, oblysta ÚIID memlekettik baǵdarlamasy boıynsha jalpy quny 600 mıllıard teńgege 18 joba júzege asyrylýda. Aǵymdaǵy jyly 7 jobany júzege asyrý arqyly 1 myńnan astam jańa jumys ornyn ashý josparlanǵan.
Sonymen qatar, oblys ákimi Elbasynyń «Rýnı jańǵyrý» jalpyulttyq baǵdaralamasyn júzege asyrý barysyna erekshe kóńil bólinip otyrǵanyna toqtaldy.
«Bul baǵytta oblysta jalpy quny 10,2 mıllıard teńgege 102 joba anyqtalǵan. Onyń ishinde 4,8 mıllıard teńgesin «Týǵan jerge - taǵzym» patrıottyq aktsııa qatysýshylary, bıznes ókilderi, metsenattar jáne óz eldi mekeniniń týmalary esebinen alynyp otyr», dedi Málik Myrzalın.
Óz kezeginde halyq qalaýlylary jergilikti atqarýshy organdardyń jumysy týraly usynylǵan taldaý qorytyndysy boıynsha aldaǵy mindetter belgilengen jáne ony birlese júzege asyrý kerektigin atap ótti.
