Jyl sońyna deıin 643 aýyl Internet jelisine qosylady

NUR-SULTAN. QazAqparat - Osy jyldyń sońyna deıin 643 aýyl Internet jelisine qosylady. Bul týraly Ortalyq komýnıkatsııalar qyzmetindegi brıfıngide QR Tsıfrlyq damý, qorǵanys jáne aeroǵarysh ónerkásibi vıtse-mınıstri Daryn Tuıaqov aıtty, dep habarlaıdy QazAqparat tilshisi.

«Búgingi kúni tótenshe jaǵdaı kezinde Internet júıesi eń qajetti qural bolyp otyr. Sondyqtan halyq arasynda áleýmettik júıelerde Internettiń sapasy jaıynda kóptegen máseleler týyndaýda. Osyǵan baılanysty, Internettiń úzdiksiz jáne sapaly jumys isteýin qamtamasyz etý maqsatynda eńbek etip júrgen aldyńǵy qatarly baılanys operatorlarynyń basshylarymen birge, Internettiń búgingi jaǵdaıy týraly sizderdi habardar etpekshimiz. Bizdiń mınıstrliktiń salalyq memlekettik organ retindegi negizgi mindeti - árbir qazaqstandyqtyń joǵary jyldamdyqty Internetke qosylý múmkindigin qamtamasyz etý telekommýnıkatsııa qyzmetteri naryǵyn arttyryp, qyzmetterdiń basqa da túrlerin ulǵaıtyp, tutynýshylardyń suranysyn jaýyp, el ekonomıkasyn kóterý bolyp sanalady. Bul oraıda, osy mindetti oryndaý maqsatynda baılanys operatorlarymen birlese otyryp, birqatar jobalar iske asyrylýda», - dedi ol.

Vıtse-mınıstrdiń aıtýynsha, qoldanystaǵy «Baılanys týraly» Zańǵa sáıkes, baılanys operatorlary óz qarajattary esebinen baılanys júıelerin salý jáne damytýdy iske asyrady.

«Bul jumys 2018 jyly bastalǵan bolatyn. Eki jyl ishinde kóp jumystar atqaryldy. Jalpy joba boıynsha 1250 aýyldy Internet jelisine qosý josparlansa, búgingi tańda 607 aýyl qosylǵan. Aldaǵy ýaqytta bul jumys jalǵasyn taýyp, qalǵan 643 aýyl jyl sońyna deıin Internet jelisine qosylatyn bolady», - dedi ol.