Jyl sońyna deıin 6,5 myńnan astam elordalyq jas jumysqa ornalasady
«Jastarmen jáne sport ókilderimen kezdestim. Erkin mıkrofon formatynda ótken jıynda nıet bildirgen kez kelgen adam suraqtaryn qoıdy. Mysalǵa olardyń qatarynda turǵyn úı baǵdarlamalaryna qatysý, bilim salasynda túrli oqytý jobalaryn engizý, sport ortalyqtaryn ashý, jas sportshylardy qoldaý jáne taǵy basqalary bar», - dep jazdy qala ákimi Іnstagram paraqshasynda.
Onyń atap ótýinshe, mundaı kezdesýler qıyndyqtardy tıimdi ári jyldam sheshýge, problemalardy nazarda ustaýǵa múmkindik beredi.
«Máselen osyǵan deıin jattyqtyrýshylar men sportshylarǵa jeke medıtsınalyq mekeme bólý týraly problema kóterilgen bolatyn. Sebebi olar kásibı tekserýdi ózge patsıenttermen qatar ótip, birge emdeletin. Al bul sportshylardyń daıyndyq sapasy men saýyqtyrý protsesine keri áser etedi. Osy máseleni birlese talqylaǵannan keıin sportshylarǵa arnalǵan arnaýly medıtsınalyq ortalyq (A-82 kóshesindegi «Nurly jol» temirjol vokzalynyń janynda) ashyldy. Sol sııaqty boks, jekpe-jek óneri ortalyqtary, jekpe-jek zaly jáne taǵy basqalary ashylyp, «Tolqyn» sport kesheni men «Jastar» saraıynda jóndeý jumysy júrgizildi. «Qazaqstan» sport kesheninde qaıta jóndeý jáne jańǵyrtý jumysy júrip jatyr» - dedi Altaı Kólginov.
Qala basshysynyń dereginshe, Kóktal-2 jáne Óndiris eldi mekenderinde dene shynyqtyrý-saýyqtyrý keshenderi ashyldy.
Atalǵan oryndarda sporttyń 10 túri boıynsha 1 myńǵa jýyq bala jattyǵyp júr.
Taǵy eki eldi mekende dál osyndaı dene shynyqtyrý-saýyqtyrý keshenderiniń qurylysy júrip jatyr. Buqaralyq sportty qarjylandyrý 3 ese artty.
«2020-2021 jyldary jattyqtyrýshy-oqytýshylardyń jalaqysy 50, bıyl taǵy 25 paıyzǵa artty. Al kadr tapshylyǵyn sheshý úshin «Dene shynyqtyrý jáne sport» mamandyǵy boıynsha grant bólemiz. Sol sııaqty jastardy qoldaý boıynsha belsendi jumys júrgizip jatyrmyz. Jastar jelisi boıynsha birneshe turǵyn úı baǵdarlamasy bar. Ótken jyly jeńildetilgen nesıeleý boıynsha arnaıy «Elorda Zhastary» turǵyn úı baǵdarlamasyn engizdik. 2 jyl ishinde 3,4 mlrd teńgege nesıe berildi. Ózge baǵdarlama – jalǵa alý boıynsha 3 jyl ishinde jumys isteıtin jastarǵa 2,5 myńǵa jýyq páter berildi», - dedi ol.
Altaı Kólginov mańyzdy máseleniń biri – jumysqa ornalasý ekendigine de basa nazar aýdartady.
«Ótken jyly 6 myń jas jumysqa ornalasty. Jyl sońyna deıin taǵy 6,5 myńnan astam jasty jumysqa ornalastyrýdy josparlap otyrmyz. Sondaı-aq bıznes-ıdeıalardy júzege asyrý úshin grant beremiz. Aýqymdy ári júıeli jumys jasaldy, biraq áli de atqarylatyn sharýa kóp. Kelip túsken suraqtardy sheshý máselesi qolǵa alyndy, oryndaý kestesin jasaımyz», - dedi elorda ákimi.
Foto: gov.kz
