Jyl sońyna deıin 5 myńnan astam eldi mekenge ınternet tartylady
«Qazirgi ýaqytta barlyq qalalar jáne 4 500-den astam aýyl ár túrli tehnologııalar boıynsha ınternetpen qamtamasyz etilgen. Jyldyń sońyna deıin jalpy 5200-den astam eldi meken ınternetke qosylady. Internet jelisin damytý úshin elimizde eki aýqymdy joba iske asyrylýda. Birinshi joba: bul memlekettik-jekeshelik áriptestik mehanızmi arqyly optıkalyq ınternetti tartý. Joba boıynsha 2,4 mln adam turatyn 1260-qa jýyq aýylǵa ınternet jelisi tartylýda. Eger 2018 jyly 56 aýylǵa optıkalyq jeli tartylsa, bıylǵy jyly oǵan 944 aýyl qosylyp jatyr»,- dedi Baǵdat Mýsın Úkimet otyrysynda.
Mınıstrdiń aıtýynsha, bul jobaǵa 75 mlrd tengege jýyq ınvestıtsııa tartylǵan.
«Joba aıasynda 3 700 memlekettik organ men bıýdjettik mekemelerge baılanys jetkizildi. Ekinshi joba - 250 adamnan kóp turǵyny bar 928 aýyldy 3G jáne 4G, FWA tehnologııasy boıynsha mobıldi ınternetpen qamtýdy kózdeıdi. Qazirgi ýaqytta 72-si mobıldi ınternetpen qamtamasyz etilgen. Bul jobanyń oryndalýy úshin operatorlar tóleıtin arnaıy salyq tólemderi tómendetilýde. Tıisti normalar Májilistiń ekinshi qaraýynan ótti. Joba aıasynda operatorlar «Sherıng» shartyna qol qoıyp, bir biriniń bazalyq stantsııalaryn paıdalana alady», - dedi ol.