Jyl sońyna deıin 480 kásiptik standartty daıyndaý qajet - Gúlshara Ábdiqalyqova
NUR-SULTAN. QazAqparat - 2019 jyldyń sońyna deıin 480 kásiptik standartty daıyndaýdy aıaqtaý qajet.
Bul týraly búgin Úkimet otyrysynda QR Premer-Mınıstriniń orynbasary Gúlshara Ábdiqalyqova aıtty, dep habarlaıdy QazAqparat tilshisi.
«Qazirgi kezdegi ǵalamdyq trend - bul tsıfrlyq ekonomıkaǵa saı bilikti mamandardy daıyndaý. Sondyqtan da elimizdiń prezıdenti Qasym-Jomart Toqaev jaqynda eńbek jáne jumyspen qamtý salasynda 7 mindetti belgiledi. Birinshi mindet - ol eńbek suranysynyń qajettiligine sáıkes kadrlardy daıyndaý. Muny iske asyrýda bizge bilim berý protsesine jáne kásibı quzirettilik máselerindegi tásildi ózgertý qajet», - dedi ol.
Osy oraıda Gúlshara Ábdiqalyqova birqatar máselege nazar aýdartty.
«Birinshiden, tehnıkalyq jáne kásibı bilim júıesindegi qurylymdyq ózgerister mınıstr aıtqandaı, birneshe baǵytpen júrýi kerek. Eń aldymen bul dýaldy oqytýdy odan ary damytý, ekinshiden, kolledjderdi basqarý protsesterin jetildirý», - dedi Úkimet basshysynyń orynbasary.
Onyń aıtýynsha, kolledjerdiń uıymdastyrý túriniń ózgerýine baılanysty olardyń materıaldyq-tehnıkalyq jaǵdaılaryn jaqsartý, qazirgi zamanǵy talaptarǵa jaýap beretin zamanaýı kásibı standarttar negizinde bilim berý baǵdarlamalarynyń mazmunyn jańartý boıynsha máselelerdi sheshý qajet.
«Osyǵan baılanysty Bilim jáne ǵylym mınıstrligine óńirlerdiń ákimdikterimen jáne «Atameken» UKP-men birlesip, áreket etýshi kolledjerge taldaý júrgizýge, olardy munan ary jetildirý boıynsha usynystardy pysyqtaýǵa bıznes qurylymdary tartý tetikterin ázirleýdi qajet etedi», - dedi Premer-Mınıstrdiń orynbasary.
Gúlshara Ábdiqalyqova ekinshiden, Eńbek jáne halyqty áleýmettik qorǵaý mnııstrligi salalyq memlekettik organdarmen birlesip, jyldyń sońyna deıin 480 kásiptik standartty ázirleýdi aıaqtaýy qajet ekendigin aıtty.
«Olardy ázirleý kestesi de anyqtaldy. Olardy toqsan saıyn qarastyratyn bolamyz. Onyń ústine Eńbek mınıstrligi apta saıyn bul jumysqa monıtorıng júrgizedi. Salalyq memlekettik organdar osy jumysqa atsalysýyna tapsyrma berýińizdi suraımyn», - dedi Gúlshara Ábdiqalyqova el Premer-Mınıstri Asqar Mamınge qarata.
Sonymen qatar ol joǵary bilikti suranysqa ıe kadrlardy daıyndaý boıynsha qoıylǵan maqsatqa tek memleket pen bıznestiń tyǵys baılanysy ǵana septigin tıgize alatyndyǵyna nazar aýdartty.
