Jyl sońyna deıin 430 myń almatylyq tegin vaktsına alady
ALMATY. QazAqparat – QR Ulttyq egý kúntizbesi aıasynda 430 myń almatylyqty vaktsınamen qamtý josparlanǵan. Onyń ishinde 25 myń júkti áıel bar, dep habarlaıdy QazAqparat tilshisi.
QR-da COVID-19 vırýsyna qatysty engizilgen karantınge baılanysty aǵymdaǵy jyldyń 22 naýryzynan bastap profılaktıkalyq egýler toqtatylyp, 11 mamyrda qaıta bastaldy. Ulttyq egý kúntizbesine sáıkes, turǵyndardy emhananyń ýchaskelik medbıkesi egýge shaqyrady.
Birinshi kezekte, josparly ekpeni almaǵan 1 jasqa deıingi balalar qamtylady. Vaktsınatsııa barlyq mindetti sanıtarlyq sharalardy saqtaı otyryp júrgiziledi. Sonymen qatar, preparatty engizer aldynda dárigerler ampýlanyń jaramdylyq merzimin, tutastyǵyn tekserýge mindetti.
«Immýndaý jumystary kúntizbege sáıkes jalǵasýda. Emhanaǵa tek aldyn ala jazylý arqyly barý kerek. Keletin patsıent jaıly medıtsınalyq mekeme qyzmetkerlerin aldyn ala habardar etedi. Vaktsınatsııa tek adamnyń saý fonynda júrgiziledi. 30 mınýt ishinde medıtsına qyzmetkerleri balanyń nemese eresek adamnyń jaǵdaıyn muqııat baqylaýy kerek. COVID-19 vırýsymen aýyryp jazylǵan jáne olarmen baılanysta bolǵan biraq, klınıkalyq belgileri joq adamdar ádettegideı vaktsınatsııalanýy múmkin», - dep atap ótti Almaty qalasy №4 emhananyń bas dárigeri Zýhra Ýmarova.
Qazaqstannyń Ulttyq egý kúntizbesinde 21 ınfektsııanyń aldyn alý jáne taralý múmkindigi qarastyrylǵan. Olar tegin beriledi.
Infektsııalyq jáne parazıttik aýrýlarǵa qarsy josparly egýge tómendegi toptar jatady:
– profılaktıkalyq egýlerdi júrgizýdiń belgilengen merzimderine sáıkes jasy kelgen adamdar;
– juqpaly aýrýlardyń (kóktemgi-jazǵy kene entsefalıti) tabıǵı oshaqtarynda turatyn jáne jumys isteıtin halyq;
– óziniń kásibı qyzmeti boıynsha qaýipti topqa jatatyn tulǵalar: medıtsına qyzmetkerleri («V» vırýs gepatıti, tumaý);
káriz jáne tazartý qurylystarynyń qyzmetkerleri (ish súzegi);
– óz densaýlyǵy boıynsha qaýipti topqa jatatyn tulǵalar:
– qan quıý protsedýrasynan ótkender («V» vırýs gepatıti);
–medıtsınalyq uıymda dıspanserlik esepte turǵan balalar (tumaý);
– balalar úıiniń, sábıler úıiniń balalary, qarttar úıiniń kontıngenti (tumaý);
– kez kelgen janýar tistegen, silekeılengen adamdar (qutyrý);
– jaraqat alyp, teri jáne shyryshty qabattary buzylǵan, jaralanǵan adamdar (sirespe);
– ınfektsııalyq syrqattanýshylyq deńgeıi joǵary óńirlerde turatyn adamdarǵa epıdemıologııalyq kórsetkishter («A» vırýsty gepatıti, tumaý, qyzylsha, qyzamyq, epıdemııalyq parotıt) boıynsha vaktsınatsııalaý júrgiziledi.
Kúzde COVID-19 vırýsymen syrqattanýdyń ekinshi tolqyny bolýy múmkin, bul rette negizgi qaýip toby sozylmaly aýrýlary bar adamdar, onyń ishinde 65 jastan asqan adamdar (júrek-qantamyr júıesi aýrýlary, qant dıabeti jáne ókpeniń sozylmaly obstrýktıvti aýrýy bar) jáne medıtsına qyzmetkerleri bolmaq.
Osyǵan baılanysty qyrkúıek aıynyń basynda tumaýǵa qarsy vaktsınatsııalaý bastalady. Qazirgi ýaqytta 130 000 doza jetkizilýi kerek. «SK-Farmatsııa» JShS biryńǵaı dıstrrıbıýtoryna qosymsha tumaýǵa qarsy vaktsınanyń 300 000 dozasyna ótinim berildi, ol 2020 jyldyń qazan aıynda jetkiziledi dep josparlanýda.
