Jyl sońyna deıin 2 myńnan astam pavlodarlyq otbasy baspanaly bolady
ASTANA. QazAqparat - Aǵymdaǵy jyldyń sońyna deıin Pavlodar oblysynda 2 myńnan astam otbasy páter kiltine ıe bolady.
Bul týraly búgin Ortalyq kommýnıkatsııalar qyzmetindegi brıfıngte Pavlodar oblysynyń ákimi Bolat Baqaýov málim etti, dep habarlaıdy QazAqparat.
«Oblystaǵy turǵyn úılerdiń negizgi kólemi «Nurly jer» jańa baǵdarlamasy aıasynda salynyp jatyr. Aǵymdaǵy jyly 230 myń sharty metr baspanany paıdalanýǵa berý josparlanǵan. 21 úı paıdalanýǵa berilip, 2192 otbasy jańa páterlerdiń ıesi atanady. Qazirgi ýaqytta «Saryarqa» shaǵynaýdanyn qarqyndy salyp jatyrmyz. Bul shaǵynaýdanda 8 úı paıdalanýǵa beriledi. Munan bólek, qosymsha bólingen qarajattardyń esebinen osy jyly oblysta taǵy 9 úıdiń qurylysy bastalady. Biz úshin «Dostyq» jańa shaǵynaýdanynyń keleshegi zor. Ony ıgerý kelesi jyly bastalady», - dedi oblys basshysy.
Onyń atap ótýinshe, óńirde halyqtyń áleýmettik jaǵynan az qamtylǵan turǵyndaryna arnalǵan jaldamaly úıler de salynyp jatyr. Qurylysy qolǵa alynǵan mundaı 4 kópterli úıdiń ekeýinde bıyl qonys toıy toılanady.
«Aýyldyq jerlerdegi bıýdjettik sala qyzmetkerleri úshin 16 páterli jataqhana salynýda. Sonymen qatar Memleket basshysynyń tapsyrmasyna sáıkes jeke turǵyn úı qurylysyn damytý boıynsha da jumystar júrgizilýde. Oblysta keleshegi aýqymdy ýchaskeler anyqtalyp, ınjenerlik ınfraqurylymdar tartylýda», - dedi Bolat Baqaýov.
