Jyl sońyna deıin 100 myńnan astam almatylyq salyqqa raqymshylyqty paıdalana alady

ALMATY. QazAqparat – Almaty qalasynyń Memlekettik kirister departamenti múlik, jer, kólik quraldary salyǵy boıynsha bereshegi bar azamattardy jyl sońyna deıin ósimpulsyz qaryzyn óteý múmkindigin paıdalanýǵa shaqyrady, dep habarlaıdy QazAqparat tilshisi.

Bul týraly Óńirlik kommýnıkatsııalar qyzmeti alańynda ótken onlaın brıfıng barysynda Almaty qalasy Memlekettik kirister departamenti basshysynyń orynbasary Orynkúl Qazıeva men Almaty qalasy Ádilet departamenti basshysynyń orynbasary Jańabaı Aǵmanov málim etti.

Memlekettik kirister departamentiniń derekterine sákes, Almaty boıynsha ósimpuldy esepten shyǵarý boıynsha aktsııanyń basynda boryshkerlerdiń sany 192 myń jeke tulǵany qurady, onda 6,5 mlrd teńgeden astam bereshek boldy, onyń ishinde negizgi borysh somasy - 5,4 mlrd teńge jáne ósimpul somasy - 1,1 mlrd teńge.

«Búgingi tańda Almaty qalasy boıynsha raqymshylyqty 84 511 salyq tóleýshi paıdalandy, onda 209,2 mln teńge somaǵa ósimpul esepten shyǵaryldy jáne negizgi boryshtyń ótelgen somasy 1,9 mlrd teńgeni quraıdy. Bul rette ósimpuldy esepten shyǵarý avtomatty túrde júrgiziledi, qaryzdyń negizgi somasyn ǵana tóleý jetkilikti», - dedi Orynkúl Qazıeva.

Jeke tulǵalarǵa 2020 jyldyń 1 sáýirindegi jaǵdaı boıynsha salyq tóleýshilerdiń derbes shottarynda esepteletin múlik salyǵy, jer salyǵy jáne kólik quraldary salyǵy boıynsha bereshegi 2020 jylǵy 31 jeltoqsanǵa deıin tólengen jaǵdaıda ósimpuldardy esepten shyǵarady.

«Mundaı norma salyq mindettemeleri kásipkerlik qyzmetti, jeke notarıýstyń, jeke sot oryndaýshysynyń, advokattyń nemese kásibı medıatordyń qyzmetin júzege asyrýmen baılanysty emes jaǵdaılardy qospaǵanda, dara kásipker retinde tirkeý esebinde turǵan adamdarǵa jáne jeke praktıkamen aınalysatyn adamdarǵa qoldanylmaıdy»,– dep atap ótti O.Qazıeva.

Óz kezeginde Jańabaı Aǵmanov salyq organdarynada oryndalmaǵan salyq buıryqtary boıynsha jáne jeke tulǵalardan bereshekti óndirip alý boıynsha derekter kelip túsetinin atap ótti. Óz tarapynan sot oryndaýshylary májbúrlep atqarýshylyq is júrgizýdi qozǵaıdy – bul shottarǵa tyıym salý, jyljymaly jáne jyljymaıtyn múlikke tyıym salý, sondaı-aq múlikti alyp qoıý.

«Atqarýshylyq is júrgizý qozǵalǵannan keıin biz sottylyq jónindegi habarlamada bul salyqtyq raqymshylyq kórsetilmeýi úshin aıyppuldardy erikti túrde tóleýdi usynamyz. Árıne, bizge kelip túsetin salyq buıryqtary ósimpuldarmen birge keledi. Sondyqtan habarlamalarda salyqtyq raqymshylyq júrgizý merzimderin túsindiremiz», - dedi J.Aǵmanov.

Habarlamalar boıynsha suraqtar týyndaǵan jaǵdaıda turǵyndar Almaty qalasy Ádilet departamentiniń call-ortalyǵyna 8 (727) 291 85 26, 8 707 615 13 95 nómirleri boıynsha habarlasa alady.