Jyl sońyna deıin 1 myń shaqyrym jol paıdalanýǵa berilmek

ASTANA. QazAqparat – Jyl sońyna deıin shamamen 1 myń shaqyrym joldy paıdalanýǵa berý josparlanyp otyr. Bul týraly Májilistegi Úkimet saǵatynda Indýstrııa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy QazAqparat tilshisi.

«Memleket basshysynyń tapsyrmasyna sáıkes, biz buryn bastalǵan barlyq jobalardy aıaqtaýymyz qajet. Búginde elimizdegi avtojol salasyndaǵy ondaı jobalardyń sany 17-ge jetti. Osy oraıda iske asyrylýy 2024 jylǵa deıin josparlanǵan 4 myń shaqyrym jol jelisi bar. Jyl sońyna deıin shamamen 1 myń shaqyrym joldy paıdalanýǵa berý josparlanyp otyr», - dedi Q. Óskenbaev.

Onyń aıtýynsha, qalǵan 3 myń shaqyrym joldaǵy jumystardy 2023 jyly aıaqtaý eskerilgen.

«Osy rette negizgi iske asyrylyp jatqan jobalarǵa toqtalaıyn. «Ortalyq - Ońtústik» baǵytynda 2024 jyldyń sońyna deıin jalpy uzyndyǵy 1 208 shaqyrym bolatyn «Qaraǵandy - Balqash - Býrylbaıtal - Qurty - Qonaev» jáne «Merke - Býrylbaıtal» jobalary aıaqtalady. «Qaraǵandy - Balqash - Býrylbaıtal - Qurty - Qonaev» ýchaskesiniń jalpy uzyndyǵy – 946 shaqyrym. Búginde ondaǵy 428 shaqyrymda qozǵalys ashyldy. Jyldyń sońyna deıin qosymsha 106 shaqyrymda qozǵalys ashylady. Qalǵan 412 shaqyrymdy 2023 jyly aıaqtaımyz», - dedi mınıstr.

Onyń sózine qaraǵanda, jyl sońynda uzyndyǵy 262 shaqyrym «Merke - Býrylbaıtal» ýchaskesinde qozǵalys tolyq ashylady. Qazirgi kezde ondaǵy 158 shaqyrym jolda kólik qozǵalysy qamtamasyz etilgen. Qalǵan 104 shaqyrym jolda qurylys jumystary júrgizilip jatyr.

«Elimizdiń shyǵys óńirlerinde jalpy uzyndyǵy 1 363 shaqyrymda 3 iri joba iske asyrylyp jatyr. Olardyń arasynda «Taldyqorǵan - Óskemen», «Qalbataý - Maıqapshaǵaı», «Úsharal - Dostyq» joldary bar. Kelesi jyly barlyq osy ýchaskeler boıynsha qurylys-montajdaý jumystary aıaqtalady», - dedi vedomstvo basshysy.

Atap aıtqanda, jalpy uzyndyǵy 768 shaqyrym «Taldyqorǵan - Óskemen» ýchaskesiniń 649 shaqyrymynda qozǵalys ashyldy. Qalǵan 119 shaqyrym jol 2023 jyly tapsyrylady.

Sonymen qatar, 415 shaqyrym bolatyn «Qalbataý - Maıqapshaǵaı» ýchaskesindegi 159 shaqyrym jolda qozǵalys ashyldy. Jyldyń aıaǵyna deıin taǵy 15 shaqyrym kosylady. Qalǵan 241 shaqyrym jol kelesi jyly paıdalanýǵa beriledi.

Jalpy uzyndyǵy 180 shaqyrym «Úsharal - Dostyq» ýchaskesindegi 155 shaqyrym jolda qozǵalys ashyldy. Al, 25 shaqyrym joldaǵy qurylys jumystary 2023 jyly aıaqtalady.

Aıta keteıik, 2025 jyly respýblıkalyq jeli boıynsha normatıvtik jaǵdaıdaǵy joldardyń úlesi 100 paıyzǵa deıin jetkizilmek.