Jyl saıyn júrek-qan tamyr aýrýlary saldarynan 40 myń adam kóz jumady

ASTANA. QazAqparat – Jyl saıyn elimizde júrek-qan tamyrlary aýrýlary saldarynan 40 myń adam qaıtys bolady. Bul týraly Senat depýtaty Aqmaral Álnazarova aıtty, dep habarlaıdy QazAqparat tilshisi.

«Qazaqstan Respýblıkasy 2015 jyly Birikken Ulttar Uıymynyń Bas Assambleıasynda qabyldanǵan 17 jahandyq Turaqty damýdyń maqsattaryna qol jetkizý boıynsha mindettemelerdi qabyldady. Turaqty damýdyń maqsattary qabyldanǵan sátten bastap memleketimizde olardy iske asyrýda ońtaıly nátıje baıqaldy. Alaıda, densaýlyq saqtaý salasyndaǵy Turaqty damý maqsattaryn quraıtyn 14 ındıkatordyń jeteýi tıisti deńgeıde oryndalmady», - dedi A. Álnazarova Senattaǵy Úkimet saǵatynda densaýlyq saqtaý máselesin talqylaý kezinde.

Onyń aıtýynsha, sonyń arasyndaǵy mańyzdy kórsetkishter qatarynda halyqtyń ortasha ómir súrý uzaqtyǵy, 30-dan 70 jasqa deıingi jas tobyndaǵa adamdardyń juqpaly emes aýrýlardan ólimin azaıtý, densaýlyq saqtaý qyzmetimen halyqty jappaı qamtý máselesi bar.

Qazaqstanda qan aınalymy júıesi aýrýlarynan bolatyn ólim-deńgeıi joǵary ekenine toqtalǵan senator: «Júrek-qan tamyr aýrýlary saldarynan adamdar múgedek bolyp jatady. Elimizde jyl saıyn 40 myńnan astam adam osy indetten qaıtys bolady», - dedi.

Óz kezeginde «University Medical Center» korporatıvtik qory» basqarmasynyń tóraǵasy ıÝrıı Pıa álem elderinde jyl saıyn júrek-qan tamyr aýrýlarynan 19 mln-ǵa jýyq adam qaıtys bolatynyn aıtty. Elimizde de osy aýrý keńinen taralyp otyr.