Jyl saıyn jol-kólik oqıǵalarynda 1,3 mıllıonǵa jýyq adam qaza bolady: álemdik statıstıka
ASTANA. Qarashanyń 16-sy. QazAqparat - Jyl saıyn álemde jol-kólik oqıǵalarynyń saldarynan 1,3 mıllıonǵa jýyq adam qaza bolady, taǵy 50 mıllıon adam jaraqattar alady, múgedek bolyp qalady.
Jol-kólik oqıǵalarynyń qurbandaryn eske alý kúnine baılanysty Dúnıejúzilik densaýlyq saqtaý uıymy osyndaı statıstıka keltirip otyr. Jol-kólik oqıǵalary 10 men 24 jastyń aralyǵyndaǵy jastardyń arasyndaǵy ólim-jitimniń basty sebepteriniń biri bolyp tabylady, dep habarlaıdy ITAR-TASS agenttigi.
Dúnıejúzilik densaýlyq saqtaý uıymy men BUU aıasyndaǵy Jol qozǵalysy qaýipsizdigi salasyndaǵy yntymaqtastyq uıymy álem elderiniń úkimetteri men úkimettik emes uıymdardy jurtshylyqtyń nazaryn jol-kólik oqıǵalary men olardyń saldaryna, sondaı-aq olardyń aldyn alý úshin qabyldanatyn sharalarǵa aýdarýǵa úndep otyr.
BUU Bas Assambleıasy 2005 jyldyń qazan aıynda belgilegen Jol-kólik oqıǵalarynyń qurbandaryn eske alýdyń Dúnıejúzilik kúni Jol qozǵalysy qaýipsizdigi boıynsha Birinshi dúnıejúzilik mınıstrler konferentsııasynyń qarsańynda atap ótiledi. Halyqaralyq konferentsııa álemniń 110 eliniń delegattarynyń qatysýymen qarashanyń 19-20-sy kúnderi Máskeýde ótedi.
