Jyl saıyn «Jas ulan» áskerı-patrıottyq mektebin 600 oqýshy támamdaıdy

ASTANA. QazAqparat – Jylyna «Jas ulan» respýblıkalyq áskerı-patrıottyq mektebin 600 oqýshy aıaqtaıdy. Bul týraly Ortalyq kommýnıkatsııalar qyzmetinde ótken brıfngide Áskerı bilim jáne ǵylym departamentiniń basshysy Jumabek Ahmetov aıtty, dep habarlaıdy QazAqparat tilshisi.

«Qazaqstan Qarýly kúshterindegi jalpy orta bilim berýdi Almaty, Qaraǵandy jáne Shymkent qalalaryndaǵy «Jas ulan» respýblıkalyq mektepteri usynady. Mektepterdiń negizgi mindeti - sapaly jalpy orta bilim berýmen qatar oqýshylardy kásiptik baǵdarlanǵan bastaýysh oqytý. Mektepterde oqý merzimi 2 jyl. Mektepke 9 synypty bitirgen jáne negizgi orta bilim týraly kýálik alǵan, oqýǵa túsý jylyna keminde 15, biraq 16 jastan aspaǵan QR azamattary qabyldanady. Jyl saıyn «Jas ulan» respýblıkalyq mektepterin shamamen 600 oqýshy bitiredi», - dep málim etti departament basshysy.

Jumabek Ahmetovtyń dereginshe, bıyldan bastap merzimdi áskerı mindetin atqarǵan jastar Qorǵanys mınıstrliginiń oqý oryndaryna emtıhansyz qabyldanatynyn aıtqan edi.