Jyl saıyn jas ǵalymdarǵa 50 ǵylymı stıpendııa berilip otyrady - mınıstrlik

ASTANA. QazAqparat – Redaktsııamyzdyń resmı saýalyna jaýap bergen Ǵylym jáne joǵary bilim mınıstrliginiń mamandary jas ǵalymdardy qoldaýǵa baǵyttalǵan sharalarǵa toqtaldy, dep habarlaıdy QazAqparat tilshisi.

«Memleket basshysynyń tapsyrmasymen jas ǵalymdarǵa qoldaý kúsheıdi. Jas ǵalymdardy granttyq qarjylandyrý aıasynda 881 joba júzege asyp jatyr. Sondaı-aq, Ǵylym jáne joǵary bilim mınıstrligi qarjylandyratyn ár jobada jas ǵalymdar men zertteýshilerdiń úlesi keminde 40% quraýy tıis. Jyl saıyn 35 jasqa deıingi talantty jas ǵalymdar úshin 50 memlekettik ǵylymı stıpendııa beriledi, jaratylystaný ǵylymdary salasyndaǵy úzdik jumys úshin jas ǵalymdarǵa arnalǵan D.Qonaev atyndaǵy jáne gýmanıtarlyq ǵylymdar salasyndaǵy úzdik jumys úshin M.Áýezov atyndaǵy syılyqtar taǵaıyndalady», - dep jazylǵan mınıstrlik usynǵan jaýapta.

Sonymen birge vedomstvo aqparatyna sáıkes, jyl saıyn ǵylymǵa qyzyǵýshylyq tanytatyn jastardyń qatary da artyp keledi.

«Byltyr 35 jasqa deıingi jas ǵalymdardyń úlesi artyp, zertteýshi ǵalymdar 5 962 adam boldy. ıAǵnı, 2021 jylmen salystyrǵanda bul salaǵa 18 jas ǵalym qosyldy», - delingen habarlamada.