Jyl saıyn temeki shegýdiń zararly saldarynan 25 myńnan astam qazaqstandyq kóz jumady
ANA. 31 mamyr. QazAqparat /Qanat Mámetqazyuly/ - Búgin - Dúnıejúzilik temekisiz kúni. Halyqaralyq temeki tartýmen kúres kúnine oraı QR Densaýlyq saqtaý mınıstrliginde baspasóz máslıhaty bolyp ótti.
«Dál osy kúni Dúnıejúzinde temekisiz kún atty aktsııalar ótip jatyr. Jalpy temeki máselesi bizdiń elimiz úshin, onyń ishinde qazaqstandyqtardyń densaýlyq saqtaý júıesi boıynsha asa kókeıtesti problemanyń biri bolyp tabylady. Esebimiz boıynsha jyl saıyn temeki saldarynan 25 myńnan astam qazaqstandyq kóz jumady. Al dúnıejúzilik eseppen qaraǵanda jyl saıyn 19 mln. adam temeki saldarynan týyndaıtyn ártúrli aýrýlardan japa shegip, qaıtys bolyp jatyr. Sondyqtan da, adamzat úshin asa úlken problemalardyń biri bolyp tabylatyn temeki tartýmen kúresti odan saıyn jetildire túsýdiń mańyzy zor», - dedi jıyn barysynda Densaýlyq saqtaý vıtse-mınıstri Erik Baıjúnisov.
Esterińizge sala keteıik, Dúnıejúzilik temekisiz kúniniń bıylǵy taqyryby sharalary Temekige qarsy kúres jónindegi Densaýlyq saqtaý uıymynyń Negizgi konventsııasyna arnalyp otyr. Bul rette Qazaqstan temeki indetin shekteýdiń qajettiligin sezine otyryp, ulttyń salamattylyǵyn arttyrý baǵytynda 2006 jyly joǵaryda atalǵan Negizgi konventsııany qabyldaǵan bolatyn. Budan bólek, 2009 jyly qabyldanǵan «Densaýlyq jáne densaýlyq saqtaý júıesi týraly» Kodeks pen «Salamatty Qazaqstan» memlekettik baǵdarlamasy sheńberinde de temekige qarsy máseleler qamtylyp otyr.
Atalǵan sharaǵa Dúnıejúzilik densaýlyq saqtaý uıymynyń qazaqstandyq bıýrosynyń jetekshisi Melıta Voınovıch, «Temeki tútininen erkin Qazaqstan úshin!» Ulttyq koalıtsııasynyń basshysy Jámılıa Sadyqova qatysyp, jıyn barysynda temekige qarsy kúres aıasyndaǵy tyń bastamalar jaıynda áńgime órbidi.
