Jyl saıyn órtten keletin shyǵyn 230 mln. teńgeni quraıdy
ASTANA. QazAqparat - Jyl saıyn órtten keletin shyǵyn 230 mln. teńgeni quraıdy. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Іshki ister mınıstrligi Tótenshe jaǵdaılar komıtetiniń tóraǵasy Vladımır Bekker málim etti.
«Jyl saıyn respýblıka boıynsha orta eseppen alǵanda 4 myńǵa tarta tabıǵı órt oqıǵalary tirkeledi. Órt shalǵan aýmaqtyń ortasha alǵandaǵy bir jyldyq kólemi 180 myń gektarǵa jetedi. Al osynaý tilsiz jaýdan bolatyn shyǵyn 230 mln. teńgeni quraıdy», - dedi V. Beker.
Onyń aıtýynsha, jyl basynan beri elimizde 24 orman órti oqıǵasy oryn alsa, sonyń 4-eýi kóktemde shóptesin ósimdikterdi órteý barysyndaǵy órt qaýipsizdigi erejelerin saqtamaýdan bolǵan. Tutastaı alǵanda, orman órtteriniń 80 paıyzǵa jýyǵy negizinen adamdar kinásinen, olardyń salǵyrttyǵynan oryn alady.
«Osyǵan baılanysty ІІM Tótenshe jaǵdaılar komıteti órt qaýpiniń artyp otyrǵan maýsymynda dala jáne orman órtteriniń aldyn alý jáne joıý josparyn bekitken. Josparǵa sáıkes, oblystyq shtabtar qurý, órtke qarsy taktıkalyq oqý-jattyǵýlar ótkizý, kúshterdi jumyldyrý, halyqty aqparattandyrý sekildi máseleler pysyqtaldy», - dedi V. Bekker.
