Jyl saıyn óndiriste 250 adam mert bolady - Tamara Dúısenova
ASTANA. QazAqparat - Búgin Májilistegi Úkimet saǵatynda QR Eńbek jáne halyqty áleýmettik qorǵaý mınıstri Tamara Dúısenova óndiristegi qaıǵyly oqıǵalarǵa qatysty málimetterdi jarııa etti, dep habarlaıdy QazAqparat.
«Jyl saıyn óndiriste 1 500-den astam jumysshy jaraqat alady jáne 250-ge jýyq jumysshy mert bolady. Eńbek gıgıenasy jáne kásibı aýrýlar ulttyq ortalyǵy málimetinshe, sońǵy bes jylda alǵash ret kásibı aýrýlar 2 600-den astam adamda anyqtaldy», - dedi mınıstr Parlament Májilisindegi Úkimet saǵatynda.
Tamara Dúısenovanyń atap ótýinshe, aǵymdaǵy jyly eńbek táýekeli kartalaryndaǵy aqparatty eskere otyryp, eńbek ınspektorlary Eńbek kodeksiniń jańa normalaryna sáıkes, zııandy ári qaýipti eńbek jaǵdaıdaǵy 149 kásiporynda boldy.
Osy oraıda aıyppul sanktsııalarynsyz eńbek qaýipsizdigi standarttaryn oryndaý turǵysynda jumys berýshilerge 300-ge tarta usynys berildi. Onyń ishinde búginde 240-qa jýyǵy oryndaldy. Úshjaqty komıssııanyń otyrystarynda eńbekaqy boıynsha qaryzdary bar 294 kásiporyn qaraldy. Aǵymdaǵy jyldyń 8 aıynda 17 jumysshynyń aldyndaǵy 2,2 mıllıard teńge eńbekaqy qaryzy óteldi. Sonymen qatar jumysshylardy bosatýdy josparlaǵan 396 kásiporynnyń 5 myń qyzmetkerin jumystan shyǵarýǵa jol berilgen joq. 100-den astam jumysshysy bar 250 kásiporyn eńbek jáne áleýmettik zańnamany jıi buzatyn táýekel tobyna jatqyzyldy.
Budan bólek, vedomstvo basshysy eńbek sharttary kóleminiń artqanyna qaramastan, beıresmı sharttar da saqtalýda jáne bul jaıt aıtarlyqtaı alańdatyp otyrǵanyn sóz etti.
«Sońǵy eki jylda eńbek ınspektorlary jumysshylardyń qyzmetin eńbek shartynsyz paıdalanǵan bir myńnan astam jumys berýshini anyqtady. Osy oraıda bul jaǵdaı kóbinese biliktiligi tómen jumysshylarǵa qatysty bolýda, ıaǵnı qurylysta, saýdada, qoǵamdyq tamaqtaný oryndarynda, aýyl sharýashylyǵynda jáne shaǵyn bızneste jumyspen qamtylǵandarǵa baılanysty. Aǵymdaǵy jyly úı-úıdi aralaý jolymen beıresmı jumysqa baǵa berildi. Osy sharamen 5,6 mıllıon adam qamtyldy. Nátıjesinde, 2,2 mıllıon adamnyń mártebesi ózektendirildi. Zeınetaqylyq jarnany bólmeı júrgen, degenmen de jumyspen qamtylǵan bir mıllıonǵa tarta adam anyqtaldy. Munymen qosa, tirkelmegen jumyssyz 320 myń adam jáne tıimsiz ózin-ózi jumyspen qamtyǵan 1,4 mıllıon belgili boldy», - dedi T.Dúısenova.
