Jyl saıyn myńdaǵan jumysshy múgedek bolyp jatady - Baqytjan Ábdiraıym
QR Kásipodaqtar federatsııasynyń tóraǵasy Baqytjan Ábdiraıymnyń aıtýynsha, búginde eńbek qaýipsizdigi máselesi ózekti bolyp tur. "Negizi, bizge eńbek qaýipsizdigi máselesine basa nazar aýdarý qajet. Osyǵan baılanysty biz azamattyq qoǵam men iri bıznespen birlesip aǵymdaǵy jyldy eńbek qaýipizdigin qorǵaý jyly der jarııaladyq. Qazirgi kezde aımaqtarda qaýipsiz eńbek boıynsha arnaıy baǵdarlamalar ázirlendi. Sebebi búginde resmı statıstıka boıynsha óndiriste 2,5 myńnan astam adam jaraqat alyp, múgedek bolyp jatady. Bul degenimiz, eki jarym myń adam qoldan, aıaqtan, kózden aıyrylyp otyrady. Olaı jalǵasa berse, biz múgedekter ultyna aınalamyz. Sondyqtan árbir oqıǵany jiti zerdeleýimiz kerek. Quqyq qorǵaýshylar da, kásipodaqtar da birden dabyl qaǵyp, tıisti sharalardy atqarýy qajet. Bárimiz osy máselege basa nazar aýdaratyn bolamyz", - dedi B.Ábdiraıym.
Onyń aıtýynsha, aldaǵy ýaqytta eńbek qaýipsizdigi boıynsha óndiristik keńesterdi qurý jumysyna basymdyq beriledi. Bul - álemdik tájirıbe. "Osy oraıda aıta ketken jón, qazirgi zańnamada eńbek qaýipsizdigi boıynsha óndiristik keńesterdi qurý mindeti bar. Ony oryndamaǵany úshin jumys berýshiler jaýap beretin bolady. Sondyqtan biz óndiristik keńesterdiń jumysyna erekshe kóńil bóletin bolamyz. Budan bólek, bıyl qoǵamdyq eńbek ınspektorlarynyń forýmyn ótkizýdi kózdeımiz. Biz olardyń jumysyn jandandyryp, quqyqtyq mártebesin kóteremiz", - dep atap kórsetti B.Ábdiraıym.
Aıta keteıik, búgin Astanada Qazaqstannyń temirjol, avtomobıl, áýe jáne sý kóligi salalyq kásibı odaǵyna qarasty bastaýysh uıymdary tóraǵalarynyń forýmy bastaldy. QR Kásipodaqtar federatsııasynyń tóraǵasy Baqytjan Ábdiraıymnyń sózine qaraǵanda, atalǵan jıynda jumysshylardyń barlyq máselelerin ashyq talqylaý josparlanyp otyr. Sebebi bastaýysh uıymdar jumysshylar problemasyn jaqsy biledi.
