Jyl saıyn medıtsınalyq kómek sapasyna qatysty 5,6 myń adamnan shaǵym túsedi – mınıstr
«Jyl saıyn medıtsınalyq kómek sapasyna qatysty 5,6 myńnan asa aryz tirkeledi. Bıyl birinshi jartyjyldyqta osyndaı 2,8 myń aryz-shaǵym kelip túsken. Bul rette 30%-dan asa jaǵdaıda faktiler naqtylanady. Ókinishke qaraı, jaǵdaı jaqsy jaǵyna ózgerip jatqan joq. Birqatar óńirlerde medıtsına qyzmetkerleriniń óz qyzmettik mindetterine oryndaýǵa salǵyrt qaraýy jáne medıtsınalyq uıymdardyń menedjementi nashar uıymdastyrylǵany baıqalady», – dep atap ótti Densaýlyq saqtaý mınıstrliginiń basshysy óz baıandamasynda.
Ajar Ǵınııat keı óńirlerde ana ólimi jaǵdaılaryn tekserý standarttary saqtalmaıtynyn jetkizdi.
«Analar óliminiń qurylymyn saralasaq, 73% – bul basqarylatyn, ıaǵnı áreket-amal jasaýǵa bolatyn sebepter, 27% ólim jaǵdaıy ǵana aýyr somatıkalyq aýrýlardyń saldarynan bolǵan», – dep atap ótti A.Ǵınııat.
Mınıstr ana ólimi boıynsha ahýal máz emes óńirlerdiń reıtınginde Qaraǵandy, Pavlodar, Batys Qazaqstan, Qyzylorda, Shyǵys Qazaqstan oblystary men Almaty qalasyn atady.
Ol Akýsherlik, gıneokologııa jáne perınatologııa ǵylymı ortalyǵynda bıyl 3 ret ana ólimine jol berilgenin «soraqy jaǵdaı» dep atady.
Sarapshylar barlyq jaǵdaıda da dıagnostıka kesh jasalǵanyn, qaýip-qater men emdeý taktıkasy durys baǵalanbaǵanyn nusqady. Saldarynan ómiri úshin mańyzdy aǵza músheleri qaıtymsyz ózgeriske ushyrap, sońy ólimmen aıaqtalǵanyn aıtty mınıstr. Akýsherlik, gınekologııa jáne perınatologııa ǵylymı ortalyǵynyń basshysy qyzmetinen bosatyldy.
Foto: gov.kz
