Jyl saıyn kóshede beımezgil júrgen 100 myńnan asa bala polıtsııaǵa jetkiziledi – ІІM

ASTANA. QazAqparat – Ortalyq kommýnıkatsııalar qyzmetindegi brıfıngide ІІM Ákimshilik polıtsııa komıteti tóraǵasynyń orynbasary Renat Zulhaıyrov jyl saıyn kóshelerde beımezgil júrgen on myńdaǵan bala poltsııa ýchaskesine jetkiziletinin aıtty, dep habarlaıdy QazAqparat tilshisi.

«Kámeletke tolmaǵandar arasyndaǵy jáne olarǵa qatysty qylmystardyń sebepteri týraly aıtatyn bolsaq, munda ata-analar balalardyń minez-qulqy men bos ýaqytyna kóńil bólmeıdi. Jyl saıyn kóshelerde beımezgil júrgen 100 myńnan astam kámeletke tolmaǵan bala polıtsııa ýchaskelerin jetkiziledi. Osy jyldyń ózinde balalardyń turǵyn úıden tys jerde bolǵany úshin ishki ister organdaryna kámeletke tolmaǵan 22 myńnan asa adam jetkizildi», - dep málim etti komıtet tóraǵasynyń orynbasary.

Renat Zulhaıyrov sondaı-aq kásipkerlerge qatysty jaýapkershilik sharalaryn eske saldy.

«Zańnamada túngi ýaqytta oıyn-saýyq oryndarynda kámeletke tolmaǵandardyń bolýyna múmkindik beretin kásipkerlerge qatysty jaýapkershilik qarastyrylǵan. Bıyl osyndaı 680 kásipker jaýapqa tartyldy. Biz mundaı adamdardy ishki ister organdarynyń esebine qoıamyz, olarmen profılaktıkalyq jumys júrgizemiz», - dep tolyqtyrdy Renat Zulhaıyrov.

Buryn habarlaǵanymyzdaı, ótken jyly bala aldyndaǵy ata-ana mindetin oryndamaǵan 7 myńnan asa adam jaýapqa tartylǵanyn málim etti.