Jyl saıyn Qazaqstannan júzdegen adam aǵzalaryn almastyrý operatsııalary úshin shetelge barady - E. Sultanov
ASTANA. 16 mamyr. QazAqparat /Qanat Mámetqazyuly/ - Jyl saıyn Qazaqstannan júzdegen adam da aǵzalaryn almastyrý operatsııalary úshin shetelge barady.
Bul týraly búgin QR Densaýlyq saqtaý vıtse-mınıstri Erik Baıjúnisovtyń tóraǵalyǵymen ótken mınıstrlik janyndaǵy Patsıentterdiń quqyn qorǵaý jónindegi qoǵamdyq keńestiń otyrysynda mınıstrliktiń Bas shtattan tys trasplantology Enver Sultanov málim etti.
«Dıalızma apparatyna tańylatyn adamdardyń, naýqastardyń sanynyń artýyna baılanysty Qazaqstanda transplantologııa salasyn damytýdyń mańyzy zor. Osy problemany ózekti túrde ári túpkilikti sheshpesek, adamdar týra osynyń saldarynan shetelge aǵylýyn toqtatpaıdy. Al odan bizdiń memleketimiz japa shegedi», - dedi maman. Onyń aıtýynsha, Qazaqstannan jyl saıyn júzdegen adam shetelge aǵzalaryn almastyrý operatsııalary úshin barady. Al ondaı operatsııalardyń quny 30 myńnan 150 myń dollar arasynda bolyp otyr. «Negizinen aǵzany almastyrý úshin qazaqstandyqtar bundaı sharalar kommertsııalyq negizben qalyptasyp úlgergen Pákistan, Qytaı sekildi memleketterge baryp jatyr. Sheteldik klınıkadan oralǵan olardyń birazy spetsıfıkalyq jáne tropıkalyq ınfektsııalardyń saldarynan kóz jumady», - dedi ol.
