Jyl saıyn Qazaqstannan 30 myń adam kóship ketedi - Statıstıka komıteti
ASTANA. QazAqparat - Jyl saıyn Qazaqstannan 30 myń adam kóship ketedi. Bul týraly búgin Ortalyq kommýnıkatsııalar qyzmetinde ótken brıfıngte QR Ulttyq ekonomıka mınıstrliginiń Statıstıka komıtetiniń tóraǵasy Álıhan Smaıylov málim etti.
«2014 jyly Qazaqstannan shetelge turǵylyqty turýǵa ketkenderdiń sany 29 myń adamdy qurady. Taldaıtyn bolsaq, sońǵy bes jylda bul úderis turaqty saqtalyp keledi. Jyl saıyn 28-30 myń adam shetelge kóship ketedi», - deıdi ol.
Degenmen onyń sózine qaraǵanda, Qazaqstanǵa qonys aýdarǵandardyń sany da osy shamada.
«Al Qazaqstanǵa kóship kelýshilerdiń sany da sońǵy bes jylda turaqty deńgeıde. Mysaly, sońǵy bes jylda Qazaqstannan ketkenderdiń sany 142 myń adamdy qurasa, dál osy osy kezeńde Qazaqstanǵa kelgender sany - 149 myń adam», - dedi komıtet basshysy.
Onyń aıtýynsha, bunyń aldyndaǵy besjyldyqta, 2005-2009 jyldary Qazaqstanǵa kóship keletinderdiń sany edáýir kóp bolǵan. Ol aralyqta 300 myńǵa jýyq adam qonys aýdarǵan.
«Elimizdegi negizgi kóshi-qon almasýy TMD memleketterimen bolýda. Al el ishinde kóship-qonýshylar sanyn qaraıtyn bolsaq, olardyń sany 38 paıyzǵa ósti jáne 80335 adamdy qurady. Óńiraralyq kóship-qonýshylardyń úlesine elimizdiń jalpy ishki kóship-qonýshylar sanynyń 40,4% (43,7%) tıesili. Óńiraralyq kóshi-qonnyń oń aıyrymy Almaty, Astana qalalarynda jáne Aqmola, Mańǵystaý, Atyraý, Qostanaı, Pavlodar oblystarynda qalyptasty», - dep atap ótti Á. Smaıylov.
