Jyl saıyn Qazaqstanǵa mıllıonnan astam mıgrant keledi
Aıta keterligi, 2016 jylǵy 10 maýsymda ótken QR Qaýipsizdik Keńesiniń otyrysynda Memleket basshysy Nursultan Nazarbaev elimizdegi qaýipsizdikti qamtamasyz etý boıynsha is-sharalar tiziminde kóshi-qon baqylaýynyń biriktirilgen júıesin jasaý jumystaryn tezdetýdi tapsyrǵan bolatyn. Osyǵan baılanysty dóńgelek ústel sheńberinde eńbek mıgratsııasynyń Astana qalasyndaǵy áleýmettik turaqtylyqqa áseri jáne eńbek kóshi-qony týraly zańdarǵa qatysty máseleler talqylandy.
«Jarııa» halyqaralyq ortalyǵy» Qoǵamdyq qorynyń kóshi-qon máseleleri jónindegi joba jetekshisi Shavhat Ismaılovtyń aıtýynsha, qazirgi tańda Qazaqstandaǵy ásirese eńbek kóshi-qony máselesin baqylaý men esepke alýdy kúsheıtý kerek. «Jyl saıyn Qazaqstanǵa mıllıonnan astam mıgrant keledi, sondyqtan da olardyń esepke alynýyn, mıgranttardyń elimizdiń aýmaǵynan kelip-ketýiniń bárin esepke alýǵa tıispiz. Óıtkeni, keıbir mıgranttar eki aptaǵa keledi. Máselen, Qyrǵyzstannan tranzıtpen Qordaıǵa kelse, sosyn olar Petropavl arqyly Reseıge ótip ketedi. Bul da mıgrant bolyp sanalady», - dedi Sh. Ismaılov. Onyń sózine qaraǵanda, Qazaqstanda turaqty negizde jyl saıyn Qyrǵyzstannan 50-90 myńnyń arasynda mıgranttar kelýde. Degenmen, elimizde eń kóp mıgranttar Ózbekstannan kelgender ári olardyń basym bóligi tirkeýsiz júredi.
«Eńbek mıgranttary arasynda Tájikstan azamattarynyń sany da basym. Sońǵy kezde Qazaqstanǵa Ýkraınadan da kóship-qonýshylar kele bastaǵan, sarapshylar buny sol eldegi saıası jaǵdaılarmen, ondaǵy eńbek naryǵynyń tómendeýimen baılanystyrady. Qazaqstanǵa keletin mıgranttar sanynyń artýyna eldegi saıası jáne ekonomıkalyq turaqtylyq septigin tıgizip otyr», - dedi Sh. Ismaılov.
