Jyl saıyn Qazaqstanda resmı túrde 150 myńdaı túsik jasalady.-Almatydaǵy konferentsııa
ALMATY. 5 Qarasha. QazAqparat /Názıra Eleýhan/ - "Jyl saıyn Qazaqstanda resmı túrde 150 myńdaı túsik jasalady. Onyń tirkelmegenderi qanshama, naqty sanyn eshkim bilmeıdi. Jas áli balany dúnıege ákelip kórmegen qyzdar úshin bunyń qaýiptiligin kópshilik bile bermeıdi.
Bul týraly Almatyda Qazaq sáýlet-qurylys akademııasynda ótken túsik jasatý jáne qyzdardyń reprodýktıvti densaýlyǵy máselelerine arnalǵan konferentsııa barysynda dáriger-gınekolog Shahıdam Seıitova aıtty.
Onyń aıtýynsha, jas qyzdardyń jartysynan kóbiniń reprodýktıvti qabileti buzylady jáne onyń arty eshqashan sábıli bola almaýǵa ákep soǵady.
Qalalyq stýdenttik otbasyn qurýdy josparlaý kabınetiniń dárigeri Gúlmıra Ámiralıevanyń aıtýynsha, ár emhanada josparlaý kabınetteri bar. "Ol jerlerde de, bizde de ár qyzǵa tegin keńes jáne gınekologııalyq kómek beriledi. Sondaı-aq tegin kontratseptik preparattardy da ala alady. Sondyqtan jastardy otbasyn qurý kabınetterine kelip, qajetti keńes alýǵa shaqyramyz", -dedi ol.
Konferentsııa barysynda stýdentter bul saladaǵy medıtsına mamandarynyń otbasyn josparlaý, sanaly túrde ata-ana bolý, bala týý qabiletin saqtaý, kontratseptsııa týraly kásibı keńesterin tyńdap, ózara pikir almasyp, túsik jasatýdyń nege alyp keletindiginen aqparat aldy. Olar sonymen qatar bul máselege qatysty óz pikirlerin de bildirdi.
Jobanyń jetekshisi Denıs Lazarevtyń aıtýynsha, bul shara "Búkilálemdik kontratseptsııa kúni" aıasynda uıymdastyrylǵan. "Buǵan deıin birneshe JOO-da osyndaı konferentsııalar ótkizildi. Biz birneshe aı boıy taǵy da basqa oqý oryndarynda aqparattandyrý jumystaryn júrgizýdi josparlap otyrmyz. Ondaǵy maqsatymyz jastarǵa sanaly túrde ata-ana bolýdyń mańyzdylyǵyn jetkizý", - dedi ol.
DDU-nyń málimetteri boıynsha, búkil álemde 80 mıllıon áıel josparlanbaǵan júktilik problemasyna ushyrasa, 20 mıllıon áıel túsik jasatady, onyń nátıjesinde 68 000 áıel kóz jumady. Bul máselege damyǵan elder de, damýshy elder de ushyrasýda.
2007 jyldyń 26 qyrkúıeginen bastap atalyp kele jatqan Dúnıejúzilik kontratseptsııa kúniniń negizgi maqsaty - álem boıynsha áıelderdiń densaýlyǵyn saqtaýda kontratseptsııany nasıhattaý, jastarǵa tanystyryp, aqparat berý, kontratseptsııa men otbasyn josparlaý tásilderin tańdaýǵa keńes berý.
