Jyl saıyn Qazaqstanda avtojoldardy kútip ustaýǵa 45 mlrd. teńgeden astam qarjy qajet

ASTANA. QazAqparat - Jyl saıyn Qazaqstanda avtojoldardy kútip ustaýǵa 45 mlrd. teńgeden astam qarjy qajet. Bul qarjy búginde bólinip otyrǵan somadan tórt esege artyq. Bul týraly búgin baspasóz máslıhatynda «QazAvtoJol» AQ basqarma tóraǵasy Ermek Qızatov málim etti.

«Qazirgi kezde avtojoldardy kútip ustaýǵa jyl saıyn 12 mlrd. teńgege tarta qarjy bólinedi. Degenmen, sarapshylyq esepteýlerdiń málimetinshe, jyl saıyn bizge 45 mlrd. teńgeden astam qarjy qajet»,-dedi ol.

Onyń sózine qaraǵanda, joldardyń jaǵdaıy sapaly bolýy úshin oǵan qajetti qarjyny aqyly avtojoldar boıynsha júrip ótýge tólenetin aqy esebinen óteý josparlanyp otyr.

Osy oraıda E. Qızatov Astana men Býrabaı aralyǵyndaǵy jol ýchaskesinde jınaqtalǵan tájirıbeni mysal etti. Osy júıeni negizgi baǵyttarǵa engizýdi josparlap otyr, ıaǵnı bul turǵyda 7 myń shaqyrymǵa jýyq avtojol qamtylmaq.

Aıta keteıik, Qazaqstandaǵy avtojoldardyń jalpy uzaqtyǵy 128 myń shaqyrym, onyń ishinde 23 600 shaqyrymy respýblıkalyq mańyzdaǵy joldar.