Jyl saıyn Qazaqstanda 16 myń azamat qaterli isik aýrýlarynan kóz jumady
ASTANA. QazAqparat - Jyl saıyn Qazaqstanda 16 myń azamat qaterli isik indetinen kóz jumady. Bul týraly búgin Astanadaǵy Halyqaralyq onkologııalyq sımpozıýmda QR Úkimet basshysynyń orynbasary Gúlshara Ábdiqalyqova málim etti.
Búginde elimizde onkologııalyq dertterden ólim-jitim deńgeıi júrek-qantamyrlary aýrýlarynan keıin ekinshi orynda turǵanyna toqtalǵan ol, «Jyl saıyn Qazaqstanda osy qaterli indetten 16 myń adam kóz jumady. Sondyqtan da qazirgi kezde respýblıkanyń onkologııalyq qyzmeti aldynda atalǵan dertke shaldyqqan adamdardy der kezinde dıagnostıkadan ótkizý men emdeý máselesi erekshe nazarǵa alyndy»,-dedi.
Onyń sózine qaraǵanda, Elbasynyń tapsyrmasy boıynsha elordada Ulttyq medıtsınalyq holdıng bazasynda Ulttyq ǵylymı onkologııa ortalyǵy qurylady. Ortalyq onkologııa salasynda aldyńǵy qatarly halyqaralyq ortalyqtardyń biri bolmaq. Osy baǵytta búginde bilikti sheteldik mamandar tartylýda, dertti zertteýdiń aldyńǵy qatarly ádistemeleri engizilip jatyr.
Sonymen qatar G. Ábdiqalyqova «Salamatty Qazaqstan» baǵdarlamasy aıasynda otandyq jáne sheteldik klınıkalar bazasynda eki júzden astam mamandy daıarlaý josparlanǵanyn atap ótti. Olardyń arasynda onkologtar, medıtsınalyq fızıkter, radıologtar, ınjenerler jáne basqa da qajetti mamandar qamtylǵan.
Taratylǵan málimetterge qaraǵanda, qaterli isikten kóz jumǵandardyń 42 paıyzy eńbekke qabiletti jastaǵy adamdar.
26 qyrkúıekke deıin jalǵasatyn sımpozıýmǵa AQSh, Eýropa jáne TMD elderiniń onkologııalyq ortalyqtarynyń dárigerleri, densaýlyq saqtaý vedomstvolarynyń mamandary, osy saladaǵy ǵylymı qyzmetkerler qatysýda.
