Jyl saıyn qaıtalanady – Aımaǵambetov mektepterge oqýlyq jetkizý problemasyn sheshpek
NUR-SULTAN. QazAqparat – Bilim jáne ǵylym mınıstri Ashat Aımaǵambetov mektepterge oqýlyq jetkizýge qatysty jyl saıyn qaıtalanatyn problemany sheshpek, dep habarlaıdy QazAqparat tilshisi.
«Jyl saıyn bizde oqýlyqtardy jetkizý (mektepterge) boıynsha problema týyndaıdy. Sol sebepti osy jyldyń 31 naýryzyna deıin oqýlyqtardy jetkizý boıynsha memlekettik satyp alý jumysyn aıaqtaýdy tapsyramyn. Ádettegideı, shilde nemese tamyz aılaryna deıin kútýdiń qajeti joq. Olaı etsek, jyl saıyn osy problemamen betpe-bet kele beremiz. Bul jumysty 31 naýryzǵa deıin atqarýǵa eshteńe kedergi keltirip turǵan joq», - dedi Ashat Aımaǵambetov Bilim jáne ǵylym mınıstrliginiń apparat otyrysynda.
Mınıstr bul baǵyttaǵy jumysty baqylaýdy óziniń orynbasary Sholpan Qarınovaǵa tapsyryp, qarjylandyrý jáne memlekettik satyp alý josparyna ózgeris engizýdi, artynsha tıisti konkýrsty ótkizýdi tapsyrdy.
«Jetkizý boıynsha problema jyl saıyn qaıtalanady», - dedi ol.
Vedomstvo basshysy sonymen qatar kontıngenttiń ózgerip bara jatqanyn esepke alýdy eskertti.
«2019 jyly birinshi synypqa kelgen balalardyń sany 2018 jyly kelgenderden kóp. Kelesi jyl olardyń sany odan da kóp bolmaq. Tıisinshe birinshi synypqa qajetti oqýlyqtarǵa tıisti qarajatty aldyn ala qarastyrýymyz kerek. Bala týý kórsetkishi joǵary. Sol sebepti aldymen kontıngentti anyqtap alǵan abzal», - dedi ol.
