Jyl saıyn elimizde zańsyz saqtalǵan 5 myńǵa tarta qarý tárkilenedi - Іshki ister mınıstri
ASTANA. 29 mamyr. QazAqparat - Qazaqstanda azamattyq qarýdyń 300 myńnan astam ıeleri tirkelgen.
Búgin Parlament Májilisinde «Travmatıkalyq qarý:zańnamalyq retteý máseleleri» atty dóńgelek ústel barysynda Іshki ister mınıstri Qalmuhanbet Qasymov osylaı málim etti.
Mınıstrdiń aıtýynsha, sońǵy jyldary azamattyq jáne qyzmettik qarý salasynda osy qarýlardy ıelený, jeke qoldanýǵa alý kórsetkishi artý úrdisine ıe bolyp otyr. «Qazir elimizde 300 myńnan astam azamattyq qarýdyń ıeleri tirkelgen. Olardyń qolynda resmı túrde 330 myńǵa tarta qarý, 1,5 myńǵa tarta zańdy tulǵalarda 30,5 myń qyzmettik qarý bar bolyp otyr. Onyń 13,5 myńy ıir oıyqty oqpandy qarý» - dedi Q. Qasymov.
Mınıstrdiń sózine qaraǵanda, aldyn alý sharalary aıasynda qarý ıelerin tekserý, qarýlardyń saqtalýyn qamtamasyz etý, ýaqtyly tirkeý men qaıta tirkeý sharalary júrgizilip otyrady. Alaıda, soǵan qaramastan qarýdyń zańsyz aınalymy aıtarlyqtaı alańdatarlyq jaǵdaıda. «Jyl saıyn zańsyz saqtalyp otyrǵan qarýdyń 5 myńǵa jýyq birligi alynady. Al zańsyz saqtalǵan qarýlardy satyp alýǵa qatysty aktsııa barysynda 2008 jyly - 22 myń birlik, 2012 jyly 15 myń birlik qarý satyp alyndy», - deıdi Q. Qasymov.
