Jyl saıyn elimizde allergııalyq dertke shaldyqqandar sany 10-20 paıyzǵa ósýde - Almatydaǵy konferentsııa
ALMATY. Qyrkúıektiń 30-y. QazAqparat /Názıra Eleýhan/ - Jyl saıyn elimizde allergııalyq aýrýlar 10-20 paıyzǵa ósýde.
Aýyldyq jerlerge qaraǵanda qala turǵyndary, ásirese, qaladaǵy balalar allergııalyq dertke jıirek shaldyǵýda. Bul týraly búgin Almatyda "Demikpe jáne allergııa" atty H-shy halyqaralyq ǵylymı-tájirıbelik konferentsııa barysynda QR Densaýlyq saqtaý mınıstrliginiń shtattan tys bas allergology Janat Ispaeva málim etti.
Onyń aıtýynsha, allergııalyq aýrýlar bala kezden qalyptasady. "Qazirgi shaqta biz derttiń ósýin boljaı alamyz. Degenmen búgingi kúni syrqattanǵandardy baqylaý men emdeý óte ózekti bolyp otyr", dedi ol.
Janat Ispaevanyń sózine qaraǵanda, áleýmettik máni bar syrqattardyń sanyn, onyń ishindegi eń qaýipti sanalatyn qolqa demikpesin tómendetýge baǵyttalǵan baǵdarlama boıynsha jańa allergııalyq aýrýlardyń klassıfıkatsııalary engizilýde jáne olardy dıagnostıkalaý men emdeýdiń standarttary jasalýda.
