Jyl saıyn elimizde adam saýdasyna qatysty 100-den astam qylmys tirkeledi

ASTANA. QazAqparat – Jyl saıyn adam saýdasyna baılanysty 100-den astam qylmys tirkeledi. Bul týraly Іshki ister mınıstrliginiń ókili Aqtoty Boranova aıtty, dep habarlaıdy QazAqparat tilshisi.

«Іshki ister mınıstrligi memlekettik organdarmen, qoǵamdyq jáne úkimettik emes uıymdarmen birlesip, adam saýdasyna qarsy kúres jáne onyń qurbandarynyń quqyqtaryn qorǵaý máselelerine arnalǵan dóńgelek ústel otyrysyn uıymdastyrdy. Onyń barysynda mınıstrlik ókilderi eldegi jaǵdaı týraly jáne osy qubylystyń aldyn alý boıynsha qandaı sharalar qabyldanyp jatqanyn habarlady. Jyl saıyn adam saýdasyna baılanysty 100-den astam qylmys tirkeledi. Orta eseppen 5 uıymdasqan toptyń zańsyz áreketi toqtatylady. Bahreın Koroldigine, Ońtústik Koreıaǵa jáne basqa elderge paıdalaný maqsatynda el azamattaryn áketý arnalary joıylady», - dedi A.Boranova mınıstrliktiń baspasóz alańynda ótken brıfıngide.

Onyń aıtýynsha, jyl basynan beri osy baǵytta 110 qylmys tirkeldi. Onyń 5-ýi jumysqa salý maqsatynda zańsyz bas bostandyǵynan aıyrý faktisine qatysty.

«Sonymen qatar jezókshelikke tartýdyń 14 derekgi anyqtalyp, onyń ishinde 7-ýi kámeletke tolmaǵandarǵa qatysty. 24 adam saýdasy faktisi tirkelip, sonyń 16-sy kámeletke tolmaǵandarǵa qatysty bolyp tur. Budan bólek, jeńgetaılyq pen prıton ustaýdyń 67 faktisi anyqtaldy», - dedi vedomstvo ókili.

Budan buryn habarlanǵandaı, bir aptada Qazaqstanda 3 myńǵa jýyq qylmys tirkeldi.