Jyl saıyn elimizde 700 mln. tonna ónerkásip qaldyqtary paıda bolady

Bul týraly búgin QR Parlamenti Májilisinde ótken Úkimet saǵatynda QR Qorshaǵan ortany qorǵaý mınıstri Nurǵalı Áshimov málim etti, dep habarlaıdy QazAqparat.

«Jyl saıyn elimizde 700 mıllıon tonna shamasynda ónerkásiptik qaldyqtar paıda bolsa, bunyń 250 mıllıon tonnaǵa jýyǵy ýly bolyp tabylady. Salystyrmaly túrde alyp qarastyrsaq, qaldyqtar boıynsha eń úlken salmaq Qaraǵandy oblysyna tıesili - 29,4 paıyzdy qurasa,  Shyǵys Qazaqstan oblysynda - 25,7, Qostanaı oblysynda - 17,0 jáne Pavlodar  oblysynda 14,6 paıyzdy quraıtyn óńirlerdegi ken baıytý keshenderi qaldyqtarynyń enshisine tıedi. Sonymen qatar, qazirgi kezde respýblıkada 96 mıllıon tonna turmystyq qatty qaldyqtar jınaqtalsa, jyl saıyn túziletin kórsetkish 2 mıllıon tonnadan asady. Qazaqstanda turmystyq qatty qaldyqtar negizinen suryptalmastan ashyq qoqystarǵa aparylyp, jınaqtalady. Qoqystardyń 97 paıyzy tabıǵatty qorǵaý jáne sanıtarlyq zańnama talaptaryna sáıkes kelmeıdi», dedi mınıstr.

Onyń aıtýynsha, eń kóp turmystyq qatty qaldyqtar Pavlodar oblysynda jáne Almaty qalasynda jınaqtalady eken. Respýblıka boıynsha eń az turmystyq qatty qaldyq kólemi Jambyl (50 myń tonna) jáne Aqmola (65 myń tonna) oblystarynda baıqalǵan.