Jyl saıyn elimizde 20-25 myń mektep túlegi ózderiniń ómirlik jolyn taba almaı qalýda - QR BǴM
ASTANA. QazAqparat - Jyl saıyn shamamen 20-25 myń mektep túlegi eki qolǵa bir kúrek tappaı qınalady. Mundaı málimetterdi búgin QR BǴM kásibı-tehnıkalyq jáne orta bilimnen keıingi bilim berý departamentiniń dırektory Sabyrjan Madeev keltirdi.
«Jyl saıyn, eń qarapaıym sanaqtar boıynsha, 20-25 myń mektep túlegi 11 jyl bilim alǵannan keıin jolaıyryqta qalady. Olar ne joǵary oqý ornyna, ne kolledjge túse almaıdy, ne áskerge ketpeıdi, sondyqtan eshqandaı básekege qabileti jetpeı, ekiushty kúı keshedi», - dep atap ótti ol «Kásibı maman daıyndaý strategııasy: problemalary men perspektıvalary» atty pedagog mamandardyń halyqaralyq ǵylymı-tájirıbelik konferentsııasynda. Aıta keteıik, shara Astananyń gýmanıtarlyq kolledjiniń 70 jyldyǵyna oraı uıymdastyrylyp otyr. Departament basshysynyń aıtýynsha, búginde bul másele keń etek jaıyp kele jatyr. «Búginde osyndaı jumyspen qamtý ortalyqtarynyń ózi «qoryta» almaıtyn jastardyń kóbeıip ketkeni sonsha, eger de biz olardy 8-shi, 9-synyptarda óziniń beıimine qaraı baǵyttap jibergen bolsaq, olar 9-synyptan keıin kolledjerge túsip, úsh jyldan soń orta maman bolyp shyǵar edi degen máseleniń sheshimin endi túsinip otyrmyz», - deıdi S. Madeev.
