Jyl saıyn elimizde 15570-ke jýyq azamat týberkýlez indetine shaldyǵady - T. Ábildaev
ALMATY. 16 naýryz. QazAqparat /Ádilet Musahaev/ - Elimizde epıdemııaǵa qarsy keshendi sharalardyń júzege asyrylýyna qaramastan, týberkýlezben aýrý joǵary deńgeıde qalyp otyr.
Bul jaıynda búgin Týberkýlez problemasy ulttyq ortalyǵynyń dırektory Tileýhan Ábildaev arnaıy ótken baspasóz máslıhatynda aıtty.
Onyń aıtýynsha, kórsetkish 2010 jyly 100 myń turǵynǵa 95,5-ti quraǵan, bul 2009 jylǵa qaraǵanda 10 paıyzǵa az. Osyǵan baılanysty týberkýlezdiń aldyn alý jáne emdeý QR-nyń 2011-2015 jyldarǵa arnalǵan «Salamatty Qazaqstan» densaýlyq saqtaýdyń memlekettik baǵdarlamasynyń basty baǵyttary bolyp tabylady.
«Keshendi túrde atqarylǵan jumystardyń arqasynda bul indettiń taralýyn 1998 jyldarǵa qaraǵanda tómendettik. Úkimettiń jáne barlyq aımaqtyq atqarýshy organdar tarapynan týberkýlezge qarsy sharalarda kóptegen qoldaýlarǵa ıe bolyp otyrmyz. Ár oblys ákimderi týberkýlezge qarsy sharalardy qoldap, qarjy bólip, aýrýǵa shaldyqqandardy emdeıtin ǵımarattardy qaıta jóndeýden ótkizip berýde. Densaýlyq saqtaý mınıstrligi qajetti medıtsınalyq jańa dıagnostıkalyq qural-jabdyqtar alyp berýde. Degenimen týberkýlezben kúres tek Úkimettiń ǵana mindeti bolmaı, oǵan búkil qoǵam bolyp jumyla atsalysý kerek», -deıdi T. Ábildaev.
Onyń pikirinshe, BAQ ókilderi halyqqa aýrý indeti jaıynda tolyqqandy maǵlumat berip, onyń aldyn alýǵa kómektesý kerek. Qazirgi tańda elimizde týberkýlezge qarsy 129 mekeme jumys isteıdi.
Al salaýatty ómir saltyn qalyptastyrý problemalarynyń ulttyq ortalyǵy dırektorynyń orynbasary Tatıana Slajneva 2011 jyly da dúnıejúzilik týberkýlezge qarsy kúni atalyp ótilip, birqatar sharalar atqarylatyndyǵyn aıtady.
Qazirgi tańda jyl saıyn elimizde 15570-teı azamat atalǵan indetke shaldyqsa, onyń 1500-ge jýyǵy osy aýrýdan kóz jumady eken. Al dúnıejúzi boıynsha jyl saıyn 9 mln adam osy dertpen naýqastanyp, olardyń 2 mıllıony atalǵan indetten baqılyq bolýda.
