Jyl saıyn elimizde 152 myńǵa jýyq adam qaıtys bolady, onyń 56,8 paıyzy er adamdar
ALMATY. 2 qarasha. QazAqparat /Erbol Turymbetov/ - Ólim sebepteriniń ishinde qan aınalymy júıesiniń aýrýlary birinshi orynda tur. Odan keıingi oryndarda er adamdardyń jaraqattanýlary men ýlanýlary, áıelderdiń - onkologııalyq dertteri tur. Bul týraly búgin Salaýatty ómir saltyn qalyptastyrý Ulttyq Ortalyǵynyń dırektory Sáýle Dıqanbaeva Almatyda ótken baspasóz máslıhatynda málim etti.
QR Statıstıka agenttiginiń málimetterine súıensek, 2009 jyly Qazaqstandaǵy ómir jasynyń uzaqtyǵy 68,6 jasty qurady. Bul rette er adamdardyń ómir jasynyń uzaqtyǵy 63,62 jas bolsa, áıelderde 73,55 jasty quraǵan.
«Bul jaǵdaı er adamdarda aýrý-syrqaýlyq paıda bolýynyń negizgi sebepteri men ólim deńgeıi tártiptik qaýip-qater faktorlaryna joǵary dárejede táýeldilikten týyndap otyr. Sonymen qatar, eńbekke jaramdy áıeldermen salystyranda, erkekter arasynda júrek qan-tamyr aýrýlarynan bolatyn ólim 3,5 esege jıirek kezdesedi. Al jaraqattanýlar 4,4 esege jıirek erler óliminiń sebebi bolady», - dedi S. Dıqanbaeva.
Statıstıkalyq derekter boıynsha, psıhoaktıvti zattardy qoldanýmen esepte turǵandardyń 88 %-y, al alkogol qoldanatyndardyń 89 %-y erler úlesinde. Oǵan qosa, alkogoldi tutynýdan bolatyn psıhıkalyq jáne tártiptik buzylystar aýrý-syrqaýlyǵy 100 myń turǵyn halyqqa erlerde 58,6, al áıelderde 70,8 quraıdy.
