Jyl saıyn elimizde 14 myńnan astam naýqas qaterli isikten kóz jumady

ASTANA. QazAqparat – Jyl saıyn elimizde 35 myńnan astam adam obyrǵa shaldyǵady. Bul týraly búgin Senattaǵy Úkimet saǵatynda Densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.

«Respýblıkada jiti koronarlyq sındromy bar naýqastarǵa kómek kórsetý úshin 41 teri arqyly koronarlyq aralasý ortalyǵy, 74 ınsýlt ortalyǵy jumys isteıdi. Koronarlyq aralasý ortalyqtary men ınsýlt ortalyqtary jelisin odan ári damytamyz. 2-deńgeıli 4 teri arqyly koronarlyq aralasý ortalyǵy Túrkistan, Qaraǵandy, Almaty jáne Jambyl oblystarynda ashyldy. Sondaı-aq 30 ınsýlt ortalyǵyn ashýdy josparlap otyrmyz. 2023-2025 jyldary Qyzylorda, Mańǵystaý, Shymkent, Almaty qalalarynda ashylady. Atyraý, Shyǵys Qazaqstan, Batys Qazaqstan oblystarynda da bul jumys qolǵa alynǵan», - dedi mınıstr.

Ajar Ǵınııat onkologııalyq aýrýlarmen kúres Memleket basshylyǵynyń erekshe baqylaýynda turǵanyn basa aıtty.

«Jyl saıyn elimizde 35 myńnan astam adam obyrǵa shaldyǵyp, 14 myńnan astam adam qaıtys bolady, Dıspanserlik esepte 200 myńnan astam qazaqstandyq tur. Onkologııadan bolatyn ólim-jitim úshinshi orynǵa shyqty», - dedi ol.

Ajar Ǵınııat mınıstrlik onkologııalyq aýrýlarmen kúres jónindegi 2023-2025 jyldarǵa arnalǵan keshendi jospardyń jobasyn ázirlegendigin atap ótti.