Jyl saıyn dene shynyqtyrý daıyndyǵynan prezıdenttik testileýdi sátti tapsyratyn oqýshylar azaıyp keledi - Úkimet otyrysy
ASTANA. 9 shilde. QazAqparat - Dene tárbıesi pánin aptasyna eki saǵatqa deıin qysqartý halyqaralyq tájirıbege de saı kelmeıdi.
Bul týraly búgin Úkimet otyrysynda QR Sport jáne dene shynyqtyrý isteri agenttiginiń tóraǵasy Erlan Qojaǵapanov málim etti.
«Búginde oqýshylardyń dene shynyqtyrý belsendiligin shekteıtin problemanyń biri - ol QR Bilim jáne ǵylym mınıstrligimen ótken jyldyń aıaǵynda bekitilgen tıptik bilim berý josparyna sáıkes, mektepterde dene tárbıesi pánin aptasyna eki saǵatqa deıin qysqartýmen baılanysty. Atalǵan qysqartý halyqaralyq tájirıbege de saı kelmeıtinin atap ótkim keledi»,-dedi agenttik basshysy. Halyqaralyq tájirıbede oqýshynyń dene tárbıesi baǵytyndaǵy belsendiligine aptasyna 3-6 saǵat ýaqyt bólinedi eken.
Onyń paıymdaýynsha, sabaq ýaqytyn qysqartý aldaǵy oqý jylynyń nátıjesi boıynsha óskeleń urpaqtyń dene tárbıesi kórsetkishteriniń tómendeýine alyp keledi. «Bul óz kezeginde olardyń densaýlyǵynyń aıtarlyqtaı nasharlaýyna ıtermeleıdi. Jyl saıyn dene tárbıesi daıyndyǵy boıynsha prezıdenttik testtiń normatıvterin sátti tapsyratyn oqýshylar sany kemip kele jatqandyǵy tańǵaldyrmaıdy. 2012 jyly prezıdenttik testke qatysqan 613 myń oqýshynyń ishinen tek 3 paıyzy ǵana tabysty ótti, «jaqsy» degen kórsetkishke 10 paıyzdan sál astamy ǵana qol jetkizdi. Al qalǵandary múldem tapsyra almady»,-dedi E. Qojaǵapanov.
Óz kezeginde QR Premer-Mınıstri Serik Ahmetov dene tárbıesi sabaǵyn mektepterde aptasyna 3 saǵat mindetti túrde ótkizý máselesin qarastyrýdy tapsyrdy.
