Jyl saıyn Birikken Arab Ámirlikterine Qazaqstannan 20 myńǵa jýyq týrıst barady
ASTANA. 4 sáýir. QazAqparat - Jyl saıyn Birikken Arab Ámirlikterine Qazaqstannan 20 myńǵa jýyq azamat týrıstik vızamen barady.
Bul týraly búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasy men Birikken Arab Ámirlikteri arasyndaǵy Qylmyskerlerdi ustap berý týraly kelisimdi ratıfıkatsııalaý týraly» zań jobasy boıynsha baıandaǵan Bas prokýrordyń birinshi orynbasary Iogan Merkel málim etti.
I. Merkeldiń aıtýynsha, Qazaqstan úshin Arab Ámirlikteri aýqymdy týrıstik qyzyǵýshylyqty týdyryp keledi. «Mysaly, jyl saıyn bizdiń 20 myńǵa tarta azamattarymyz Birikken Arab Ámirlikterine týrıstik vızamen barady», - deıdi Bas prokýror orynbasary.
Onyń aıtýynsha, qylmyskerlerdi ustap berýge qatysty osyndaı kelisim Qazaqstan men Qytaıdyń, Koreıanyń, Lıtvanyń, Mońǵolııanyń, Túrkııanyń jáne taǵy basqa birqatar elderdiń arasynda jasalǵan. «Degenmen Eýropalyq Odaq bizdiń sottyń ádil tóreligi týraly tórt konventsııaǵa qosylǵanymyzdy qalamaı otyrǵandyqtan, biz búgingi kúni Eýropa elderimen de osyndaı ekijaqty kelisimder jasaýdy qolǵa alyp jatyrmyz», - deıdi Iogan Merkel.
