Jyl saıyn baspana kezegindegi 20 myń adam úıli bolyp, jańadan 50 myń adam tirkeledi - mınıstrlik

ASTANA. QazAqparat – Jyl saıyn baspana kezegindegi 20 myń adam úıli bolsa, olardyń ornyna 50 myń azamat jańadan kezekke turady. Indýstrııa jáne ınfraqurylymdyq damý mınıstriniń orynbasary Erkebulan Daýylbaev Senattyń úkimet saǵatynda osyndaı derek aıtty, dep habarlaıdy QazAqparat tilshisi.

«Búginde ákimdikterde 623 myń azamat kezekte tur. Onyń 400 myńnan astamy halyqtyń áleýmettik jaǵynan osal tobyna jatady.

Bul rette, memlekettik qoldaý sharalary sheńberinde bir jylda nebári 20 myń azamat turǵyn úımen qamtylady. Olardyń ornyna 50 myń azamat jańadan kezekke turady.

Kezektiliktiń artýy, bıýdjetke aıtarlyqtaı aýyrtpalyq túsiredi jáne áleýmettik turǵyn úı qurylysy men jeńildetilgen kredıt berý úshin qomaqty ınvestıtsııalardy, sondaı-aq kommýnaldyq turǵyn úı qoryn kútip-ustaýdy qajet etedi», - dedi vıtse-mınıstr.

Sondaı-aq, ol keleshekte baspana kezegine ákimdik arqyly turý praktıkasy joıylatynyn eske saldy. Bul qyzmet túgeldeı «Otbasy bank» AQ-ǵa berilmek.