Jyl saıyn álemde 58 mln. adam kóz jumady
ASTANA. 11 maýsym. QazAqparat - Búgin Parlament Májilisi depýtaty Darıǵa Nazarbaevanyń jetekshiligimen Áleýmettik-mádenı damý komıtetiniń keńeıtilgen otyrysy bolyp ótti.
Onda Qazaqstandaǵy pallıatıvtik kómek kórsetý máseleleri talqylandy.
«Pallıatıvtik kómek degenimiz ne degenge kelsek, Dúnıejúzilik densaýlyq saqtaý uıymynyń anyqtaýynsha, bul - emdeýge yryq bermeıtin, ıaǵnı aýrýy jeńe bastaǵan naýqasqa belsendi ári jan-jaqty kómek kórsetý. Bul rette atalmysh kómekti uıymdastyrý negizinen naýqastyń dertiniń janǵa batýyn boldyrmaý, basqa da patologııalyq járdemdermen qatar áleýmettik, rýhanı kómekterdi qarastyrý bolyp tabylady. Ondaı adamdardyń ómir sapasyna barynsha mán berý, naýqastardy jan-jaqty qoldaý da mańyzdy bolyp tabylady. Sondyqtan da pallıatıvtik kómekti naqty qajettilikke qaraı kórsetip turǵan mańyzdy», - dedi Áleýmettik-mádenı damý komıtetiniń múshesi depýtat Nadejda Petýhova. Onyń aıtýynsha, álemde jyl saıyn 58 mln. adam kóz jumady, onyń 45 mıllıony damýshy elderde oryn alady. Al 12,7 mıllıon adamǵa jyl saıyn qaterli isik dıagnozy qoıylady. Sol qaterli isikten jyl saıyn 7,6 mln. adam qaıtys bolady.
«40 mıllıon adam AITV/JITS aýrýyna shaldyǵyp, ómir súrýde. 2009 jyly álemde 9,4 mln. adam týberkýlez aýrýynyń jańa túrin juqtyrǵan. Bir jylda 1,7 mln adam týberkýlezden kóz jumady. Qazir Qazaqstanda 144 myń adam onkologııalyq dertke shaldyqqany belgili, elimizde jyl saıyn 30 myń adamnyń dertke shaldyqqany anyqtalady. Qazir 24 myń adam týberkýlezben aýyrady», - dedi depýtat.
