Jyl saıyn 500 ǵalym álemniń jetekshi ǵylymı ortalyqtarynda taǵylymdamadan ótedi
NUR-SULTAN. QazAqparat - Jyl saıyn qazaqstandyq 500 ǵalym álemniń jetekshi ǵylymı ortalyqtarynda taǵylymdamadan ótedi. Bul jaıynda depýtattar saýalyna oraı QR Premer-Mınıstri Asqar Mamınniń bergen jaýabynda aıtylǵan, dep habarlaıdy QazAqparat tilshisi.
«Ýnıversıtetterdi zertteý baǵytyndaǵy joǵary oqý orny etip qaıta qurý aldyńǵy qatarly ǵylymı-zertteý ortalyqtary, irgeli jáne qoldanbaly ǵylymı zertteýleri, materıaldyq-tehnıkalyq bazasy, halyqaralyq derekter bazalaryndaǵy jarııalaý belsendiligi bolǵan jaǵdaıda júzege asyrylady. Jalpy zertteý ýnıversıteti mártebesi 6 joǵary oqý ornyna berildi («Nazarbaev Ýnıversıteti» DBU, «Q.I. Sátbaev atyndaǵy Qazaq ulttyq tehnıkalyq zertteý ýnıversıteti» KeAQ, «S.D. Asfendııarov atyndaǵy Qazaq ulttyq medıtsına ýnıversıteti» KeAQ ( QazUMÝ), «Qaraǵandy medıtsına ýnıversıteti» KeAQ, «Qazaq ulttyq agrarlyq ýnıversıteti» KeAQ jáne «S.Seıfýllın atyndaǵy Qazaq agrotehnıkalyq ýnıversıteti» KeAQ). Bilim jáne ǵylym mınıstrligi basqa JOO zertteý ýnıversıtetterine aınaldyrý máselesin pysyqtaýda», - dedi Úkimet basshysy.
Onyń atap ótýinshe, zertteý baǵytyndaǵy JOO qyzmetiniń nátıjesinde klasterler jumys isteıdi. Osylaısha, iri sheteldik kompanııalarmen ózara is-qımylda «Nazarbaev Ýnıversıteti» bazasynda 3 ınnovatsııalyq klasterde kommertsııalandyrý ofısteri, bıznes-ınkýbator jáne tehnopark ornalasqan.
«Samuryq-Qazyna» Qory 4 mln AQSh dollary kóleminde «Nazarbaev Ýnıversıtetine» qoldaý kórsetedi. Ál-Farabı atyndaǵy Qazaq ulttyq ýnıversıteti ınjınırıng jáne ǵylymdy qajetsinetin tehnologııalar klasterin, sondaı-aq Vırtýaldy qabyldaý stantsııasy bar Jerdi qashyqtan zondtaý ortalyǵyn qurdy.
D.Serikbaev atyndaǵy Shyǵys Qazaqstan memlekettik tehnıkalyq ýnıversıtetiniń bazasynda «Qazmyrysh» JShS-men, «Úlbi metallýrgııa zaýyty» AQ-men birlesip metallýrgııa salasynda ǵylymı-zertteý-óndiristik klasteri qurylǵan.
QazUTZÝ bazasynda addıtıvti óndiris pen ınjınırıngti damytý úshin Indýstrııalyq dızaın ortalyǵy quryldy.
«Budan basqa, JOO-lardyń óndirispen baılanysy konsortsıýmdar qurý arqyly júzege asyrylady. A.Baıtursynov atyndaǵy Qostanaı óńirlik ýnıversıteti «KAMAZ» JAQ-pen yntymaqtastyq aıasynda mashına jasaý salasyndaǵy ınjener kadrlardy maqsatty daıarlaý úshin Injınırıngtik ortalyq qurý jumysyn bastady. Zertteý JOO-laryn qoldaý maqsatynda ǵylymı qyzmetkerlerdiń biliktiligin arttyrý, halyqaralyq deńgeıdegi ǵalymdardy tarta otyryp, zertteýlerdi qarjylandyrý júzege asyrylady. 2019 jyldan beri Halyqaralyq ǵylymı-tehnıkalyq ortalyq qazaqstandyq ǵalymdardyń qatysýymen 16 jobany iske asyryp jatyr (12 qazaqstandyq jáne 4 birlesken joba). Jyl saıyn qazaqstandyq 500 ǵalym álemniń jetekshi ǵylymı ortalyqtarynda taǵylymdamalarmen qamtamasyz etiletin bolady», - dedi Premer-Mınıstr.
