Jyl saıyn 260 myń qazaqstandyq donor bolady
ASTANA. QazAqparat - Búgin Qazaqstannyń barlyq qan ortalyqtary Dúnıejúzilik qan donory kúnin «Men ne isteı alamyn?». «Qan tapsyryńyz.
Ony qazir tapsyryńyz. Ony jıi tapsyryńyz!» degen uranmen atap ótýde, dep habarlaıdy QazAqparat.
QR Densaýlyq saqtaý mınıstrligi málimetinshe, Transfýzıologııa ǵylymı-óndiristik ortalyǵynda qurmetti donorlardy quttyqtaý sharasy ótti.
QR DSM Medıtsınalyq kómekti uıymdastyrý departamentiniń dırektory Ajar Tóleǵalıevanyń sózine qaraǵanda, jyl saıyn 260 myńnan astam adam respýblıkanyń qan ortalyqtaryna qan tapsyrýǵa keledi. Sońǵy 10 jyl ishinde qan qyzmeti reformanyń úlken joldarynan ótip, qazir Qazaqstannyń bul qyzmeti damyǵan elderden esh qalyspaıdy. Árbir oblys ortalyqtarynda sapaly quraldarmen jabdyqtalǵan zamanaýı qan ortalyqtary jumys jasaıdy. Donor qandaryn zertteý tolyqtaı halyqaralyq standarttarǵa sáıkes júzege asyrylady. Transfýzııalyq terapııanyń ınfektsııalyq jáne ımmýnologııalyq qaýipsizdigin arttyrý úshin leıkofıltrleý, vırýstyq ınaktıvatsııa, qan komponentterin sáýlelendirýdiń jańa tehnologııalary engizildi.
Іs-shara sheńberinde elordanyń qurmetti donorlary «Densaýlyq saqtaý isine qosqan úlesi úshin» tós belgisimen, alǵys hattarmen marapattaldy jáne estelik syılyqtar aldy.
QR DSM Transfýzıologııa ǵylymı-óndiristik ortalyǵy respýblıkanyń qan qyzmetin uıymdastyrý-ádistemelik súıemeldeý úshin 2011 jyldyń aqpan aıynda QR Úkimetiniń sheshimimen quryldy. Qazirgi kezde Ortalyq Astananyń 22 medıtsınalyq uıymyn qan jáne onyń komponentterimen qamtamasyz etedi. Bul rette 2016 jyly jalpy alǵanda 64 941 doza qan komponentteri berildi. Ortalyqtyń donorlarynyń jalpy sany - 23 410. Kúndelikti qan donorlary boıynsha kórsetkish: 80-90 adam, 1 aıda - 1800-1900, al jylyna 23 000 - 24 000 adam shamasynda.
DDSU usynýymen qan donorlyǵynyń damý kórsetkishteri 1000 adamǵa shaqqanda - 25, al Qazaqstanda donorlar sany búgingi tańda 1000 adamǵa shaqqanda 15-ti quraıdy. Ulttyq deńgeıde bul kórsetkish shamamen jylyna 202 myń donordy qamtıdy. Sonymen qatar, Astanada 1000 adamǵa shaqqanda 38 kórsetkish tirkelgen.
Esterińizge sala keteıik, jyl saıyn 14 maýsymda álem boıynsha Dúnıejúzilik qan donory kúni atap ótiledi. Bıylǵy jyly jahandyq is-shara 2017 jyly 14 maýsymda Hanoıda ótedi.
