Jyl saıyn 21 myńǵa jýyq túlek JOO-ǵa túse almaıdy - Ulttyq keńes
Aýyl mektepteri túlekterine oqýǵa túsý kvotasyn 50 paıyzǵa jetkizý usynyldy
«Jyl saıyn 21 myńǵa jýyq mektep túlegi joǵary oqý ornyna túse almaıdy eken. Onyń basym bóligi aýyldan shyqqandar, ıaǵnı aýyldaǵy bilim men qaladaǵy bilim teń emes. Biraq ýnıversıtetke túsetin kezde aýyl men qala oqýshysyna talap birdeı qoıylady. Osyǵan baılanysty qazir aýyldan shyqqan túlekter ýnıversıtetke túsetin bolsa, 30 paıyz kvota qarastyrylǵan. Biz óz tarapymyzdan aýyldyq túlekterge arnalǵan kvotany 50 paıyzǵa deıin arttyrýdy suraımyz», - dedi L. Qojahmetova.
Sonymen qatar ol jastar praktıkasy baǵdarlamasyna toqtaldy.
«Dıplom alǵan jas ózinde eńbek ótili men tájirıbe bolmaǵannan keıin, jumysqa tura almaı júredi. Jastar praktıkasy baǵdarlamasy arqyly kez kelgen ulttyq kompanııaǵa, memlekettik mekemege jumysqa tursa, jumyspen qamtý ortalyǵy onyń 6 aılyq jalaqysyn tóleıdi. Osy merzimde sol jerde ózin jaqsy kórsete alsa, bul mekemelerde jumysqa qalady. Biraq jastar praktıkasy baǵdarlamasy boıynsha jumys isteýge jastar qulyqsyz. Sebebi onyń jalaqysy qolǵa alǵanda 60 myń teńge shamasynda. Oqýdy bitirip kelgen jas jigit 60 myń teńgege ómir súre almaıtyndyqtan, bul baǵdarlamamen jumysqa barmaıdy. Sol sebepti jastar praktıkasy arqyly tólenetin jalaqy kólemin kóbeıtýdi suraımyz», - dedi keńes múshesi.
Budan buryn habarlanǵandaı, L.Qojahmetova koronavırýstyń birinshi kezeńinde daǵdarys ortalyqtaryna júgingen áıel men bala kóbeıgenin aıtqan bolatyn.
Onyń sózinshe, kópbalaly otbasylar tarapynan bıznes kýrstarǵa degen suranys joǵary boldy.
