Jyl saıyn 20 myńnan astam adam jol-kólik apatynan jaraqat alady

NUR-SULTAN. QazAqparat – Jyl saıyn elimizdiń joldarynda 2 myńnan astam adam mert bolady. Bul týraly QR ІІM Ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranova aıtty, dep habarlaıdy QazAqparat tilshisi.

«Statıstıkanyń qaıǵyly kórsetkishterin keltiretin bolsaq, sońǵy 5 jylda el joldarynda jyl saıyn 2 myńnan astam adam kóz jumady. Taǵy 20 myńnan astam adam jaraqat alady. Osy jyldyń 6 aıynda Qazaqstanda 6 myńnan astam jol-kólik oqıǵasy tirkelip, 947 adam qaza taýyp, 8 110 adam ár túrli dene jaraqatyn aldy», - dedi ol Іshki ister mınıstrliginiń baspasóz qyzmeti alańynda ótken brıfıngte.

Onyń atap ótýinshe, jolkólik oqıǵalarynyń basym kópshiliginiń negizgi sebebi júrgizýshiler men jaıaý júrginshilerdiń jol júrisi qaǵıdalaryn sanaly túrde buzýy bolyp tur. Oqıǵalardyń 95 paıyzy júrgizýshilerdiń kinásinen oryn alady. apattardyń oryn alý sebepteri de burynǵydaı. Naqtyraq aıtqanda, jyldamdyq rejımin asyrý; manevr jasaý qaǵıdalaryn buzý; qarsy qozǵalys jolaǵyna shyǵý; jaıaý júrginshiler men velosıpedshilerdiń jol qozǵalysy erejesin buzýy bolyp otyr.

«Jyldamdyq rejıminiń saqtamaýǵa baılanysty 1,5 myńǵa jýyq jol apaty tirkeldi. Onda 300-ge jýyq adam qaza taýyp, 2 myńǵa jýyq adam jaraqat aldy», - dedi Aqtoty Boranova.