Jyl saıyn 20 myń áıelge qoldaý kórsetemiz – Eraly Toǵjanov

NUR-SULTAN. QazAqparat – Elimizde jyl saıyn 20 myń áıelge kómek pen qoldaý kórsetiledi. Bul týraly QR Premer-Mınıstriniń orynbasary Eraly Toǵjanov málim etti, dep habarlaıdy QazAqparat tilshisi.

«Búgin elordada jańadan ashylǵan «Baqytty otbasy» áıelderge arnalǵan ortalyqtyń jumysymen tanystyq. Ortalyq basshylyǵy men qyzmetkerlerine alǵys aıtqym keledi. Búginde 1700-ge jýyq áıel kásip meńgerip, onyń 800-i eńbekpen qamtyldy. Memleket basshysynyń tapsyrmasyna sáıkes biz halyqtyń kirisin kóbeıtýge arnalǵan baǵdarlamany ázirledik. Sonyń aıasynda jyl saıyn 20 myń áıelge kómek, qoldaý kórsetetin bolamyz», - dedi Eraly Toǵjanov elordada áıelderdi qoldaýǵa arnalǵan ortalyqtyń ashylý saltanatynda.

Onyń aıtýynsha, qazirgi qoǵamda áıel zatynyń róli jyl sanap artyp keledi.

«Elimizde ár ana birneshe bala tárbıelep otyr. Buǵan deıin aıtqanymdaı, el táýelsizdiginiń tiregi – ana. Táýelsizdigimizdi saqtap, kelesi urpaqqa amanat etý - bizdiń mindetimiz. Bul jolda ana sútimen beriletin qasıet pen tárbıeniń róli erekshe», - deıdi ol.

Sondaı-aq, Úkimet basshysynyń orynbasary shara barysynda salt-dástúrdi saqtap, qolóner, tiginmen aınalysyp, ulttyq qundylyqtardy dáriptep júrgen áıelderge alǵys hat tapsyrdy.

Aıta keteıik, búgin Nur-Sultanda áıelderdi qoldaýǵa arnalǵan «Baqytty otbasy» ortalyǵy ashyldy.