Jyl saıyn 2 mıllıonnan asa adam boıynda AITV-ınfektsııasy bar-joǵyn tekseredi
ASTANA. 18 jeltoqsan. QazAqparat - Qazaqstandyqtar AITV-ınfektsııasyna testten jıi óte bastady. Bul týraly QR Densaýlyq saqtaý mınıstrliginiń baspasóz qyzmeti habarlady.
«Qazaqstanda AITV-ınfektsııasyna testpen qamtýda nysanaly maqsat 10% bolsa, qazir 14 paıyzǵa qol jetkizildi. Testpen qamtý kólemi 2006 jylmen salystyrǵanda 2 esege ósti. Jyl saıyn 2 mıllıonnan asa test ótkiziledi. Qazaqstanda densaýlyq saqtaýdy damytýdyń «Salamatty Qazaqstan» memlekettik baǵdarlamasyn iske asyrýdaǵy oń nátıjelerdiń biri osyndaı», - delinedi aqparatta.
JITS-tyń aldyn alý jáne oǵan qarsy kúres jónindegi respýblıkalyq ortalyq (JITS RO) mamandarynyń zertteýleri 2012 jyly AITV-ınfektsııasyna 2 mıllıon 342 myń test ótkizilgenin (salystyrý úshin: 2010 jyly -2 mıllıon 85myń; 2011 jyly 2 mıllıon 207 myń) kórsetti. Elimizde testten ótý kóleminiń ortasha jyldyq ósimi 6% quraıdy.
«Jyl saıyn halyqtyń AITV-ınfektsııasy shoǵyrlanǵan jáne taralǵan toptarda testpen qamtý kólemi artyp kele jatqanyn aıtý kerek» - dedi JITS respýblıkalyq ortalyǵynyń bas dırektory Marat Tókeev.
«Olar ınektsııalyq esirtkini tutynýshylar jáne jynystyq qyzmetterdi kórsetetin áıelder. AITV-ǵa testten ótken ınektsııalyq esirtkini tutynýshylar sany 2012 jyly 2010 jylǵy deńgeımen salystyrǵanda 1,5 esege artty», - dep atap kórsetti ol.
Testten naqty sapaly ótkizý úshin óńirlerdegi JITS ortalyqtary álemdik standarttar deńgeıindegi zamanaýı qurylǵylarmen jabdyqtalǵan. Qazaqstan azamattary úshin AITV-ǵa testten ótý óńirlik JITS ortalyqtarynda erikti jáne aqysyz negizde júrgiziledi. Zańnamalyq aktilerge sáıkes júkti áıelder, donorlar, sottalǵan adamdar testten mindetti túrde ótkiziledi.
