Jyl saıyn 18 mln gektar egistik erozııaǵa ushyraıdy – senator
NUR-SULTAN. QazAqparat – QR Parlamenti Senatynyń depýtaty Álı Bektaev respýblıka jerlerindegi topyraq sapasy jóninde Premer-Mınıstr Asqar Mamınge saýal joldady, dep habarlaıdy QazAqparat.
Senator bıylǵy qýańshylyq agroónerkásiptik keshendi damytý baǵdarlamalarynyń álsiz jaqtary men kemshilikterin anyqtady dep sanaıdy. Álı Bektaev ǵylymı negizdelgen agrotehnologııalardyń engizilmeýine, topyraqty melıoratsııalaý jáne jerdi sýarý rejıminiń saqtalmaýyna baılanysty aýyl sharýashylyǵy jerleriniń qunarlylyǵy jyldan jylǵa tómendep kele jatqanyna alańdaýly.
«Elimizdiń Ekologııa, geologııa jáne tabıǵı resýrstar mınıstrliginiń málimetinshe, sýarmaly jerler men ondaǵy egis alqaptarynyń degradatsııasy 10%-ǵa, orman jerleri 8%-ǵa jetip otyr. Aýyl mańyndaǵy jerlerdi baqylaýsyz, júıesiz paıdalaný saldarynan elimizdiń basty baılyǵy – jaıylymdardyń ózi 20-60% aralyǵynda tozǵan», - dedi Álı Bektaev Senattyń búgingi otyrysynda.
Depýtattyń aıtýynsha, topyraq sapasyn saqtaý boıynsha memlekettik saıasattyń bolmaýynan egis alqaptary men jem-shóp alqaptary da qysqarýda. Bul, óz kezeginde, jalpy agrarlyq sektordyń damýyna teris áser etedi.
«1990 jyldan beri aýyl sharýashylyǵy daqyldary egiletin alqap 40%-ǵa kemip, al mal azyǵyn óndiretin jerler 70%-ǵa qysqarǵan. Sýarmaly jerlerdiń onnan bir bóligi qunarlylyǵyn joǵaltqan. Melıoratıvtik jaǵdaıynyń tómendeýinen 15 paıyzy paıdalanýdan shyqqan. Jyl saıyn 18 mln gektar egistik jerler jel jáne sý erozııasyna shaldyǵýda», - dedi senator.
Álı Bektaev 2021-2024 jyldarǵa arnalǵan aýyl sharýashylyǵyn damytý jónindegi memlekettik baǵdarlamaǵa topyraqty saqtaý salasyndaǵy memlekettik saıasatty qalyptastyrý úshin birqatar naqty sharalardy engizýge shaqyrdy.
Senatordyń pikirinshe, Qazaqstannyń aýyl sharýashylyǵy alqaptarynyń topyraǵyna agrohımııalyq zertteýler júrgizý jáne olardy qalpyna keltirýdiń kezeń-kezeńimen josparyn qalyptastyrý mańyzdy.
«Sonymen birge, topyraq sapasynyń ózgerýin ǵana emes, jalpy ekologııalyq jaǵdaıdy únemi baqylaıtyn aqparattyq júıelerdi qalyptastyrýǵa memlekettik qoldaý kórsetý mańyzdy. Osy oraıda tsıfrlandyrý men jer resýrstaryna kosmomonıtorıng júıesi masshtabyn keńeıtý qajet», - deıdi Á. Bektaev.
