Jyl saıyn 16 myńnan astam jastar kásipsiz qalyp jatyr
ASTANA. 9 jeltoqsan. QazAqparat - Elimizde jyl saıyn 16 myńnan astam jastar kásipsiz qalyp jatyr. Búgin Májilistegi Úkimet saǵatynda baıandama jasaǵan Bilim jáne ǵylym mınıstri Aslan Sárinjipov osylaı málim etti.
«Tehnıkalyq jáne kásiptik bilim berý salasyndaǵy basty maqsat - tutynýshylardyń suranystaryn eskere otyryp kásiptik tehnıkalyq bilimge teńdeı qol jetkizýdi qamtamasyz etý jáne sapany arttyrý. Osyǵan oraı, aldaǵy ýaqytta tehnıkalyq jáne kásiptik bilim berý boıynsha birqatar problemalarmen jumys istemekpiz. Birinshi, kásip alýǵa qol jetkizýdiń aýmaqtyq baǵdarlamalyq jáne qarjylaı shektelýin sheshýdi josparlaımyz. Toqtala ketetin jaıt, jyl saıyn 16 myńǵa tarta jastar kásipsiz qalyp otyr. Olar esh jerde oqymaıdy, jumys ta istemeıdi. Bulardyń segiz myńy mektep bitirýshiler bolsa, qalǵan segiz myńnan astamy - kolledjder men joǵary oqý ornynan shyǵarylǵan balalar. Sonymen qatar, 28 myń mektep bitirýshi alǵashqy tehnıkalyq mamandyqty aqyly negizde alyp otyr», - deıdi A. Sárinjipov.
Mınıstr jastardy kásippen qamtý baǵytynda bilim jáne bıznes júıesi arasynda áriptestik ornatý qajettigin de alǵa tartty. Onyń aıtýynsha, bıznesti damyta otyryp, ony kásiptik jáne tehnıkalyq bilim berý salasyna qatysýyn kúsheıtken mańyzdy. Sonymen qatar, vedomstvo basshysy kadrlar daıarlaýda elimizdegi Údemeli ındýstrııalyq-ınnovatsııalyq damý baǵdarlamasynyń basymdyqtarymen ushtastyrýdyń qajettigin de alǵa tartty. «Sońǵy úsh jylda kásiptik jáne tehnıkalyq bilim berý salasynan jeti myńnan astam oqytýshylar ketti. Olardyń basym bóliginiń joǵary biliktiligi joq jáne eńbek naryǵyna suranysqa ıe emes», - deıdi A. Sárinjipov.
